Armaniston prezidenti Armen Sarkisyan rasman iste’foga chiqdi. Mamlakat qonunlariga ko‘ra, davlat rahbari o‘z arizasini yetti kun davomida qaytarib olmasa, u kuchga kiradi, deb xabar beradi “Kommersant”.
Sarkisyan iste’foga chiqishini 23-yanvar kuni e’lon qilgandi. U davlat rahbarligidan ketayotganini mamlakat siyosati, urush va tinchlik masalalariga ta’sir o‘tkaza olmayotgani bilan izohlagan. Prezidentning majburiyatlarini vaqtincha Milliy yig‘in spikeri Alen Simonyan bajarib turadi.
OAV ma’lumotlariga ko‘ra, mamlakatdagi “Fuqarolik kelishuvi” hukmron partiyasi prezidentlik lavozimiga yuqori texnologiyalar sanoati vaziri Vaagn Xachatryan nomzodini ilgari suradi.
Sarkisyan 2018-yilda parlament tomonidan davlat rahbari etib saylangan edi. 2015-yildagi konstitutsiyaviy islohotlardan so‘ng mamlakat parlamentli boshqaruv shakliga o‘tdi. Yangi shaklda prezident faqat vakillik vakolatlariga ega, uning o‘zi parlament tomonidan yetti yil muddatga saylanadi. Sarkisyan — diplomat, 1996—1997-yillarda Armaniston hukumatini boshqargan, uning nomzodi o‘sha paytdagi hukmron Armaniston partiyasi fraksiyalari va uning koalitsiyadagi hamkori — so‘l millatchi “Dashnaksutyun” partiyasi tomonidan ko‘rsatilgan.
Avvalroq “Porloq Armaniston” partiyasi rahbari Edmon Marukyan va tashqi ishlar vaziri Ararat Mirzoyan Armaniston prezidentligi lavozimiga da’vogarlik qilishi mumkinligi to‘g‘risida xabar berilgandi. “Armaniston” muxolifat fraksiyasidan bo‘lgan parlament deputati Andranik Tevanyan Sarkisyan respublikadan chiqib ketganini ma’lum qilgan. Qator arman OAVlari u Londonda ekanini yozmoqda.
Izoh (0)