«Толибон» афғон талабаларининг ўқув машғулотларига қайтишига рухсат берди, деб ёзади Reuters. Афғонистон олий таълим вазири Абдулбоқи Ҳаққоний мамлакатдаги олий таълим муассасаларини қайта очишга рухсат берилганини эълон қилган.
Унинг аниқлик киритишича, иқлими иссиқ бўлган вилоятларнинг талабалари 2022 йил 2 февралдан, совуқ иқлимли вилоятларда истиқомат қилувчи талабалари эса 26 февралдан ўқишга қайтиши мумкин. Янги семестр бошланишидан олдин ҳар бир ОТМда имтиҳонлар бўлиб ўтади.
Шу билан бирга, вазир қизларнинг ҳам ўқув машғулотларига қайтиш ёки қайтмаслиги тўғрисидаги саволга жавоб беришни истамаган.
Афғон олий таълим муассасалари ва мактабларида ўқув дарслари 2021 йилнинг августи охирида, мамлакатда ҳокимият тепасига «Толибон» келганидан сўнг тўхтатилганди. Сентябрь ўрталарида эса бошланғич мактаблар ўз ишини қайта бошлаган, бироқ дарсларга фақат ўғил болалар ва эркак ўқитувчилар киритилган. Айрим хусусий университетлар ҳам очилган, аммо кўплаб ҳолатларда талабалар ўқишга қайта олмаган.
«Толибон» мамлакатда яна ҳокимият тепасига келган август ойида ҳаракат матбуот котиби Забиҳулла Мужоҳид аёлларга «ислом қонунлари доирасида» ишлаш, ўқиш ва жамият бошқарувида иштирок этишга рухсат берилишини айтган эди. Шу билан бирга, толибларнинг шартларига кўра, Афғонистонда аёлларнинг барчаси ҳижоб (паранжи) кийиши керак бўлади. «Толибон» аввалги бошқаруви давридан фарқли равишда бу сафар аёлларнинг уйдан ёлғиз, эркаклар ҳамроҳлигисиз чиқа олиши мумкинлигини кафолатламоқда.
Кейинчалик Мужоҳид Афғонистондаги ишлайдиган аёлларни ўз хавфсизлиги учун уйдан чиқмасликка чақирганди. «Бизнинг хавфсизлик кучларимизга аёллар билан қандай муносабатда бўлиш, улар билан қандай мулоқот қилиш ҳақида ўргатилмаган. Мамлакатда тўлиқ хавфсизлик ўрнатилмагунча аёллардан уйда қолишини сўраймиз », — деган эди ҳаракат вакили.
Изоҳ (0)