AQSh sobiq prezidenti Donald Tramp 2024-yilda yana mamlakat prezidenti etib saylansa, Kapitoliyga bostirib kirishda ayblanganlar va tartibsizlik ishtirokchilarini afv etishini aytdi.
“Agar saylovda qatnashsam va g‘alaba qozonsam, biz bu odamlarga adolatli munosabatda bo‘lamiz. Afv qilishga to‘g‘ri kelsa, ularni kechiramiz, chunki (hozir) ularga nisbatan adolatsiz munosabatda bo‘lishmoqda”, — dedi Tramp Texasdagi tarafdorlari bilan uchrashuvda.
2021-yil 6-yanvar kuni AQSh Kongressi a’zolari Donald Trampning prezidentlik saylovlarida mag‘lub bo‘lganini tasdiqlash uchun yig‘ilgan vaqtda Trampning tarafdorlari Kongressga bostirib kirgandi. Tartibsizliklar oqibatida Kapitoliyning xavfsizlik xodimi bilan birgalikda, besh kishi halok bo‘lgan.
Bayden ushbu tartibsizliklarni davlat to‘ntarishiga urinish deb bilishini aytgandi. Uning so‘zlariga ko‘ra, o‘shanda “guruhni tartibsizliklarga undashga, erkin va adolatli saylovlarni rad etishga hamda Amerika tarixida birinchi marta hokimiyatning tinch yo‘l bilan o‘tishiga to‘sqinlik qilishga” urinilgan.
Hujum bo‘yicha olib borilgan keng ko‘lamli tergov davomida 700 dan ortiq odam hibsga olingan va ularga turli darajada ayblovlar qo‘yilgan.
Tramp, shuningdek, 2022-yilda Pekinda bo‘lib o‘tadigan qishki Olimpiya o‘yinlaridan keyin Xitoy va Tayvan o‘rtasida ma’lum o‘zgarishlar bo‘lishidan ogohlantirdi. U prezident Jo Bayden ma’muriyatini Xitoy bilan munosabat o‘rnatishda qobilyatsizlikda aybladi.“Keling, Olimpiya o‘yinlaridan keyin nima bo‘lishini ko‘ramiz, men yaxshi bashoratchiman, o‘yinlardan keyin Tayvan va Xitoy bilan nimalar yuz berishini ko‘raylikchi?”, — dedi Tramp.
Shuningdek, Tramp Kongress respublikachilar nazoratiga qaytgan zahoti AQSh prezidenti Jo Bayden ustidan korrupsiyaga qarshi tergov boshlash bilan tahdid qildi.
“Ishonchingiz komil bo‘lsin, respublikachilar Kongressda g‘alaba qozonsa, Baydenning korrupsiyasi Kongress tomonidan tekshiriladi va fosh qilinadi. Baydenlarning Xitoydan olgan millionlab dollarlari, shuningdek, Jo nega (Xitoy) Kommunistik partiyasini bizda va butun dunyoda tarqalgan virus uchun javobgarlikka tortishdan bosh tortganini tushuntirib beradi”, — dedi sobiq prezident.
Bundan tashqari Trampning aytishicha, AQShning hozirgi ma’muriyati o‘z chegaralarini himoya qilish o‘rniga Ukrainani himoya qilishga haddan tashqari ko‘p e’tibor qaratmoqda.“Vashingtonda hamma Ukraina chegarasini qanday himoyalash haqida o‘ylayapti, ammo biz uchun dunyodagi eng muhim chegara — bu Ukraina chegarasi emas, Amerika chegarasi. Bu borada esa hech narsa qilmayapmiz, kimligi haqida ma’lumotimiz bo‘lmagan odamlarga mamlakatimizga kirish uchun ruxsat beryapmiz”, — dedi sobiq prezident.
Tramp, 2021-yil yanvaridagi voqealarga qaramay, Respublikachilar partiyasida juda mashhurligicha qolmoqda. Kuzatuvchilar u 2024-yilda yana AQSh prezidenti bo‘lishga urinib ko‘rishi mumkinligini istisno qilmayapti. O‘z navbatida, Bayden ham sog‘lig‘ida jiddiy muammolar bo‘lmasa, 2024-yilda qayta saylanishga harakat qilishini aytgan.
Mavzuga doir: Tramp prezidentlik davri haqida kitob chop etmoqchi
Izoh (0)