Fransiya hukumati avval va’da qilganidek, Pekinda o‘tkaziladigan qishki Olimpiada o‘yinlariga diplomatik boykot e’lon qilgan bir qator G‘arb davlatlariga qo‘shilmadi. Bu haqda Fransiyaning Yevropa ishlari bo‘yicha davlat kotibi Klement Bonga tayanib, “Interfaks” xabar berdi.
“O‘yinlarda sport vazir-delegati Roksana Marasinyanu ishtirok etadi. U ochilish marosimiga qatnasha olmasligi mumkin, lekin Olimpiada o‘yinlari paytida sportchilarimizni qo‘llab-quvvatlash uchun boradi”, — dedi Bon RTL radiostantsiyasi efirida.
Avvalroq Fransiya prezidenti Emmanuel Makron Pekinda 4-fevralda boshlanadigan Olimpiada o‘yinlarini diplomatik boykot qilish g‘oyasini mantiqsiz deb hisoblashini aytgandi. Makronning fikricha, yo Olimpiadani “butunlay boykot qilish” va unga sportchilarni yubormaslik kerak, yoki “foydali harakatlar bilan vaziyatni o‘zgartirishga urinish” kerak.
Bunga qadar AQSh Xitoyni inson huquqlarini buzishda ayblab, qishki Olimpiada o‘yinlarini siyosiy boykot qilgandi. Avstraliya, Buyuk Britaniya va Kanada unga qo‘shilgan.
Ma’lumot uchun, diplomatik boykot rasmiy delegatsiyalarning Olimpiadaga borishdan bosh tortishini anglatadi. Ushbu cheklovlar sportchilarga ta’sir qilmaydi.
XXIV qishki Olimpiada o‘yinlari Pekinda 2022-yilning 4—20-fevral kunlari bo‘lib o‘tadi. 4—13-mart kunlari Xitoy poytaxti Paralimpiya o‘yinlariga mezbonlik qiladi.
Izoh (0)