Gemaniya janubi-g‘arbida joylashgan Kusel tumanida sodir bo‘lgan otishma oqibatida ikki nafar politsiyachi halok bo‘ldi. Bu haqda Kayzerslautern shahri politsiyasi o‘zining Twitter’dagi sahifasi orqali ma’lum qildi.
“Kuzel hududida joylashgan Mayvaylerxof va Ulmet orasidagi yo‘l-patrul xizmati paytida bugun ertalab ikki nafar politsiyachi otib ketildi: erkak va ayol”, — deyiladi xabarda. Shu bilan birga, jinoyatchilar haqida biror ma’lumot yo‘qligi ko‘rsatilgan. Hozirda hodisa nima sababdan yuzaga kelgani aniqlanmoqda.
DPA agentligi ma’lumotlariga ko‘ra, ko‘ngilsiz hodisa mahalliy vaqt bilan soat 04:20 larda (Toshkent vaqti bilan 08:20)sodir bo‘lgan. Ayni vaqtda jinoyatchilarni qidirish ishlari amalga oshirilmoqda. Voqea joyi yaqinida transport harakatlari to‘xtatilgan.
Bild gazetasining o‘z manbalariga tayanib yozishicha, politsiyachilar avvaliga o‘z hamkasblariga ratsiya orqali avtomobilni tekshirish uchun to‘xtatgani va uning yukxonasida o‘ldirilgan hayvon borligi to‘g‘risida xabar bergan. Shundan keyin politsiya xodimlari “ular bizga qarata o‘q uzyapti”, deya baqirgan va aloqa uzilgan. Shu sababli gap brakonyerlar haqida ketayotgan bo‘lishi mumkin.
Shuningdek, 31-yanvar kuni Moskva viloyatida joylashgan harbiy qismlarning birida shartnoma bo‘yicha harbiy xizmatchi “beixtiyor” quroldoshini otib qo‘ydi. Ta’kidlanishicha, u qurol-yaroqni saqlash xonasida bo‘lgan va o‘qotar quroldan foydalanish talabini qo‘pol ravishda buzgan holda, beixtiyor o‘q uzib yuborgan. Oqibatda uning yonida bo‘lgan harbiy xizmatchi jarohat olib, vafot etgan.
Avvalroq Ukrainada Milliy gvardiya askari to‘rt hamkasbi va bir fuqaroni otib tashlagani to‘g‘risida xabar berilgandi. Askar qurol-yarog‘ omboriga kirib, pulemyot va patronlarni olgach, hamkasblariga qarata o‘q otishni boshlagan. Omborda 22 kishi bo‘lgan, ulardan ikki nafari tashqariga yugurib chiqib, politsiya va tez yordamni chaqirgan.
Izoh (0)