Shimoliy Koreya 30-yanvar kuni Hwasong-12 ballistik raketasini uchirganini tasdiqladi. Bu haqda Koreya markaziy telegraf agentligiga tayanib, Janubiy Koreyaning Yonhap agentligi xabar berdi.
Uchirishdan maqsad “ishlab chiqarilgan snaryadga baho berish” edi. Natijada raketaning “aniqligi, xavfsizligi va samaradorligi” tasdiqlandi, deya qayd etgan Markaziy telegraf agentligi.
Shimoliy Koreya Yapon dengizi tomon noma’lum snaryadni uchirgani haqida 30-yanvar kuni Yaponiya va Janubiy Koreya harbiylari xabar bergan edi. Bu KXDRning yil boshidan beri yettinchi marta raketa uchirishi. Har ikki davlatda snaryad ballistik raketa ekani taxmin qilingan.
Yaponiya hukumati matbuot kotibi Xirokadzu Matsunoning aytishicha, raketa taxminan 800 kilometr uchgan, parvozning maksimal balandligi esa 2 ming kilometr atrofida bo‘lgan. Janubiy Koreya harbiylariga ko‘ra, raketaning tezligi tovush tezligidan 16 baravar yuqori bo‘lgan. Harbiylar avvalroq raketa KXDR 2017-yilda sinovdan o‘tkazgan Hwasong-12 ga o‘xshashini ta’kidlagan edi. Uchirish Chagando provinsiyasi hududidan amalga oshirilgani aytilmoqda.
Ushbu voqeadan so‘ng Yaponiya va Janubiy Koreya milliy xavfsizlik kengashlari yig‘ilish o'tkazdi, unga Janubiy Koreya prezidenti Mun Chje In raislik qildi.
Yaponiya hukumati KXDRga norozilik bildirdi. Matsuno respublikaning xatti-harakatlari BMT Xavfsizlik Kengashi rezolyutsiyalariga zid ekanini va mamlakat, mintaqa va xalqaro hamjamiyat xavfsizligiga tahdid solayotganini aytdi.
Janubiy Koreya Pxenyan yadro quroli va qit’alararo ballistik raketa sinovlariga qo‘yilgan moratoriysini bekor qilishga yaqinlashayotganidan xavotir bildirdi.
Pentagon matbuot kotibi Jon Kirbi esa raketa uchirilishidan so‘ng AQSh Shimoliy Koreya bilan muzokaralarga tayyorligini va Koreya yarimorolini yadrosizlantirishga sodiqligini e’lon qildi.
Hwasong 12 — o‘rta masofaga uchuvchi ballistik raketa. KXDR ilk bor 2017-yilning may oyida bunday turdagi raketani sinovdan o‘tkazgan edi. O‘shanda raketaning uchish masofasi 787 kilometr, balandligi 2 ming kilometrdan ortiq bo‘lgan.
Izoh (0)