Vaksinatsiyadan keyin koronavirusning omikron shtammiga chalingan bemorlarda COVID-19 ning kelajakdagi turlariga qarshi “superimmunitet” hosil bo‘lishi mumkin. Bu kabi ma’lumotlar Oregon salomatlik va ilm-fan universiteti olimlari tomonidan e’lon qilindi, deb xabar beradi Business Insider.
Ta’kidlanishicha, “superimmunitet” faqat vaksina asosida ishlaydi, chunki kasallikdan keyingi tabiiy himoya virusdan “oddiy” himoyani ta’minlay oladi xolos.
Olimlarning aniqlashicha, delta shtamm vaqtida kasallikdan tuzalgan emlangan fuqarolar Pfizer dori vositasining ikkinchi dozasini olgandan ko‘ra samaraliroq himoyaga ega bo‘lgan.
“Nafaqat antitanalar darajasi, balki turli xil variantlarni o‘zaro neytrallash imkoniyati ham muhim”, — deydi tadqiqot hammualliflaridan biri Fikadu Tafesse.
Uning so‘zlariga ko‘ra, to‘liq emlangan fuqaroning kasallikka chalinishida organizm koronavirusning o‘zgaruvchanligi haqida ma’lumotga ega bo‘ladi va “antitanalar to‘plamining qo‘shimcha murakkablik darajasini yaratadi”.
Avvalroq Kembrij universiteti olimlari boshqa himoya choralarisiz atigi ikki metrlik ijtimoiy masofaga rioya qilgan holda COVID-19 infeksiyasidan himoyalanish samaradorligini tahlil qilgandi. Tadqiqot shuni ko‘rsatadiki, agar odam masofa saqlasa-yu, ammo niqob taqmasa, baribir koronavirusdan himoyalanmaydi. Olimlar yo‘talayotgan odamning og‘zidan uchib chiqadigan tomchilar uning atrofida qanday tarqalishini o‘rgangan. Ma’lum bo‘lishicha, agar odam niqob taqmagan bo‘lsa, bu tomchilar, ayniqsa ular juda mayda bo‘lsa, ikki metrdan uzoqroqqa uchib ketishi mumkin.
Izoh (0)