OAV: Buyuk Britaniya bosh vaziri Ukraina atrofidagi vaziyat sabab Yaponiyaga tashrifini bekor qildi

Buyuk Britaniya bosh vaziri Boris Jonson Yaponiyaga rejalashtirilgan tashrifini bekor qildi, deb xabar beradi Kyodo agentligi.

Yaponiya agentligining hukumatdagi manbalariga tayanib ma’lum qilishicha, Jonsonning mamlakatga tashrifi fevral o‘rtalariga rejalashtirilgan bo‘lgan, biroq Britaniya tomoni Tokioga mazkur tashrif bekor qilingani to‘g‘risida xabar bergan. Bunga “Ukraina atrofidagi vaziyatning keskinlashuvi” sabab qilib ko‘rsatilgan.

Tashrifga tayyorgarlik ko‘rilayotgani to‘g‘risida rasman xabar berilmagan, ammo NHK telekanali 29-yanvar kuni Jonson fevral o‘rtalarida Yaponiyaga kelishi va bosh vazir Fumido Kisida bilan birga muzokaralar o‘tkazishini ma’lum qilgandi. Taxminlarga ko‘ra, tomonlar Xitoy, Ukraina, yangi koronavirusga qarshi kurash, shuningdek, dekarbonizatsiya (ugleroddan foydalanishni kamaytirish) masalalarini muhokama qilishi kerak bo‘lgan.

Yaponiya Vazirlar Mahkamasining bosh kotibi Xirokadzu Matsuno 31-yanvar kuni o‘tkazilgan matbuot anjumanida “Buyuk Britaniya bosh vazirining Yaponiyaga tashrifi hozirda muvofiqlashtirilayotgani haqidagi ma’lumotlar haqiqatga to‘g‘ri kelmasligini” ma’lum qilgan.

Rossiya bir necha oydan beri Ukraina chegaralariga qo‘shin to‘plamoqda, bu esa G‘arb davlatlarining Rossiya Ukrainaga bostirib kirishga tayyorlanayotgani haqidagi taxminlariga sabab bo‘lmoqda. Moskva buni qat’iyan rad etib, qo‘shinlarning o‘tkazilishini mashqlar bilan izohlaydi. G‘arb davlatlari Rossiya Ukrainaga bostirib kirsa, unga qarshi sanksiyalar qo‘llashga va’da bermoqda.