Гемания жануби-ғарбида жойлашган Кусел туманида содир бўлган отишма оқибатида икки нафар полициячи ҳалок бўлди. Бу ҳақда Кайзерслаутерн шаҳри полицияси ўзининг Twitter’даги саҳифаси орқали маълум қилди.
«Кузел ҳудудида жойлашган Майвайлерхоф ва Улмет орасидаги йўл-патруль хизмати пайтида бугун эрталаб икки нафар полициячи отиб кетилди: эркак ва аёл», — дейилади хабарда. Шу билан бирга, жиноятчилар ҳақида бирор маълумот йўқлиги кўрсатилган. Ҳозирда ҳодиса нима сабабдан юзага келгани аниқланмоқда.
DPA агентлиги маълумотларига кўра, кўнгилсиз ҳодиса маҳаллий вақт билан соат 04:20 ларда (Тошкент вақти билан 08:20)содир бўлган. Айни вақтда жиноятчиларни қидириш ишлари амалга оширилмоқда. Воқеа жойи яқинида транспорт ҳаракатлари тўхтатилган.
Билд газетасининг ўз манбаларига таяниб ёзишича, полициячилар аввалига ўз ҳамкасбларига рация орқали автомобилни текшириш учун тўхтатгани ва унинг юкхонасида ўлдирилган ҳайвон борлиги тўғрисида хабар берган. Шундан кейин полиция ходимлари «улар бизга қарата ўқ узяпти», дея бақирган ва алоқа узилган. Шу сабабли гап браконьерлар ҳақида кетаётган бўлиши мумкин.
Шунингдек, 31 январь куни Москва вилоятида жойлашган ҳарбий қисмларнинг бирида шартнома бўйича ҳарбий хизматчи «беихтиёр» қуролдошини отиб қўйди. Таъкидланишича, у қурол-яроқни сақлаш хонасида бўлган ва ўқотар қуролдан фойдаланиш талабини қўпол равишда бузган ҳолда, беихтиёр ўқ узиб юборган. Оқибатда унинг ёнида бўлган ҳарбий хизматчи жароҳат олиб, вафот этган.
Аввалроқ Украинада Миллий гвардия аскари тўрт ҳамкасби ва бир фуқарони отиб ташлагани тўғрисида хабар берилганди. Аскар қурол-яроғ омборига кириб, пулемёт ва патронларни олгач, ҳамкасбларига қарата ўқ отишни бошлаган. Омборда 22 киши бўлган, улардан икки нафари ташқарига югуриб чиқиб, полиция ва тез ёрдамни чақирган.
Изоҳ (0)