AQSh prezidenti Jo Bayden, Buyuk Britaniya bosh vaziri Boris Jonson, shuningdek, qator Yevropa davlatlari yetakchilari, Yevropa Ittifoqi va NATO Ukraina atrofidagi vaziyatning rivojlanishini, jumladan, harbiy mojaro yuzaga kelsa, Rossiyaga qarshi sanksiyalar qo‘llashni muhokama qildi, deb xabar beradi The Mirror.
Siyosatchilar onlayn tarzda “Rossiya tajovuzkorligini”, jumladan, Moskva uchun jiddiy iqtisodiy xarajatlarni tayyorlash va NATOning sharqiy qanoti mudofaasini kuchaytirish yo‘lidagi sa’y-harakatlarni muhokama qilgan.
Uchrashuv yakunlari bo‘yicha Ukrainaga “hujum” uyushtirilsa, Rossiyaga qarshi “misli ko‘rilmagan sanksiyalar paketini” joriy etish zarurligi bo‘yicha qaror qabul qilingan. Shu bilan birga, yetakchilar diplomatik muzokaralar “birinchi darajali vazifa” ekanini qayd etgan. “Shuningdek, ular xalqaro hamjamiyat Ukraina suverenitetiga putur yetkazadigan har qanday harakatga toqat qilmaslik kerakligi haqida kelishib oldi”, — deya qo‘shimcha qiladi Britaniya bosh vaziri matbuot xizmati.
Eslatib o‘tamiz, Ukraina bilan chegarada Rossiya qo‘shinlarining to‘plangani haqidagi ma’lumotlar oktabr oyida g‘arb OAVlarida paydo bo‘lishni boshlagan. Noyabr oyi o‘rtalarida Ukraina prezidenti Vladimir Zelenskiy chegarada 100 ming Rossiya qo‘shini borligini ma’lum qilgan. AQSh Davlat kotibi o‘rinbosari Viktoriya Nuland Rossiyaning Ukrainaga “bostirib kirishi” 2022-yil boshida sodir bo‘lishi mumkinligini aytgan.
Moskva bu ma’lumotlarni rad etib, Ukrainadagi harbiy harakatlarga tayyorgarlik haqidagi xabarlarni “quruq, asossiz keskinlik” deb atamoqda. Qolaversa, Rossiya g‘arb davlatlaridan NATOning sharqqa tomon kengaymasligi, Ukraina esa bu tashkilotga qabul qilinmasligi haqida kafolat talab qilgan.
Vashington bir necha bor AQSh va ittifoqchilari Ukraina atrofida vaziyat keskinlashgan taqdirda, Rossiyaga qarshi sanksiyalar joriy etishga tayyorligini bildirgan. Avvalroq Oq uy matbuot kotibi Jen Psaki Rossiya Ukrainaga bostirib kirgan taqdirda, Vashington unga qarshi ilgari e’lon qilingan sanksiyalarning birortasini, jumladan, SWIFT banklararo mablag‘ o‘tkazish tizimidan uzib qo‘yish variantini ham istisno qilmasligini aytgan. The Telegraph ma’lumotlariga ko‘ra, “Shimoliy oqim-2” gaz quvuriga qarshi sanksiyalar joriy etilishi ham mumkin. Shu bilan birga, Handelsblatt nashri hukumatdagi manbalariga tayanib, Qo‘shma Shtatlar va Yevropa Ittifoqi davlatlari Rossiyani SWIFT tizimlaridan uzib qo‘yish imkoniyatini ko‘rib chiqishdan bosh tortganini ma’lum qilgan.
Izoh (0)