BMT oldidagi barcha qarzdor davlatlar, Papua-Yangi Gvineya va Venesueladan tashqari, Bosh assambleyada yana ovoz berish huquqiga ega bo‘ldi. Bu haqda tashkilot ma’lumotlariga tayanib, “Kommersant” xabar berdi.
BMT bosh kotibi xalqaro aktivlari AQSh sanksiyalari ostida bo‘lgan Eron to‘lovni amalga oshirgani va ushbu huquqni qayta tiklayotganini ta’kidlagan.
BMT nizomiga ko‘ra, qarzdorligi o‘tgan to‘liq ikki yil uchun a’zolik badali miqdoriga teng yoki undan oshadigan a’zolar ovoz berish huquqidan mahrum bo‘ladi. “2022-yil 21-yanvardagi maktubimga qo‘shimcha ravishda shuni sharaf bilan ma’lum qilamanki, Eron BMT nizomining 19-moddasida belgilangan miqdoridagi qarzlarni kamaytirish uchun zarur to‘lovni amalga oshirdi”, — deyiladi Gutterishning e’lon qilingan xatida.
BMT, shuningdek, Antigua va Barbuda, Sudan, Kongo, Gvineya va Vanuatuga tegishli shu kabi maktublarni e’lon qilgan. “Shunday qilib, ikki mamlakat — 76-Bosh assambleyada ovoz berish huquqiga ega emas: Papua-Yangi Gvineya va Venesuela”, — deyiladi xabarda. Ta’kidlanishicha, Komor orollar, San-Tome va Prinsipi hamda Somaliga qarzdor bo‘lsa-da, ovoz berishga ruxsat berilgan.
23-yanvar kuni Janubiy Koreya Tashqi ishlar vazirligi mamlakatning 18 million dollardan ortiq “muzlatilgan” mablag‘larini Eronning BMT oldidagi qarzdorligini yopishga yo‘naltirganini ma’lum qilgandi. Ta’kidlanishicha, bu AQSh Moliya vazirligi bilan kelishilgan holda amalga oshirilgan.
Eslatib o‘tamiz, 2021-yilda Komor orollari (871 ming dollar), San-Tome va Prinsipi (829 ming dollar) hamda Somali (1,4 million dollar) BMTdan qarzdorligi sabab, Bosh assambleyasida ovoz berish huquqidan mahrum qilingandi.
Izoh (0)