Burkina-Fasoda harbiylar mamlakat prezidenti Rok Mark Kristian Kaboreni hokimiyatdan chetlatdi va hukumatni o‘z nazoratiga oldi. Bu haqda mahalliy Lefaso yangiliklar portali xabar qilgan.
Xabarga ko‘ra, 14 nafar harbiydan iborat guruh davlat telekanalida to‘g‘ridan to‘g‘ri efirda chiqish qilib, hukumat boshqaruvining “Himoya va qayta tiklash vatanparvarlik harakati” ixtiyoriga o‘tganini e’lon qilgan. Tuzilmaga podpolkovnik Pol-Anri Sandaogo Damiba rahbarlik qilmoqda.
Harbiylar Burkina-Faso konstitutsiyasi bekor qilingani, hukumat va parlament tarqatib yuborilgani, quruqlik va havodagi davlat chegaralari yopilganini ma’lum qilgan.
Mamlakat hududida komendantlik soati joriy etilgan va u 05:00 dan 21:00 gacha amalda bo‘ladi. Burkina24 portali mazkur ma’lumotlar o‘rin olgan hujjatga 41 yoshli podpolkovnik Damiba imzolagani haqida xabar bergan.
Harbiylar hukumatni egallash zo‘ravonlik harakatlarisiz amalga oshirilgani, hibsga olinganlar xavfsiz joyda saqlanayotganini bildirgan.
“Himoya va qayta tiklash vatanparvarlik harakati” bugundan boshlab Kaborening prezidentlik davri tugaganini e’lon qiladi”, – deya harbiy zobitlarning so‘zlaridan iqtibos keltirgan Reuters agentligi.
Harbiylar Kabore (u 2015-yil dekabrida prezidentlik faoliyatini boshlagan) xalqni birlashtira olmagani va xavfsizlik masalalarida tahdidlarga qarshi tura olmaganini ta’kidlagan.
Burkina-Fasoda harbiylar 23-yanvar kuni bir qator bazalarda isyon ko‘targan va 24-yanvarga o‘tar kechasi prezident Kabore rezidensiyasiga qurolli hujum uyushtirilgandi. Prezidentning qayerda tutqunlikda saqlanayotgani haqida ma’lumotlar berilmagan.
Bundan avval 2021-yil noyabrda Burkina-Fasoda politsiyachilarga uyushtirilgan hujum oqibatida 53 kishi halok bo‘lgani, dekabrda jangarilarning 40 dan ortiq odamni o‘ldirgani xabar qilingandi.
Izoh (0)