NATO Ukraina yaqinida Rossiya kuchlari to‘planayotgani sabab o‘z qurolli kuchlarini jangovar shay holatga keltirmoqda va Sharqiy Yevropaga qo‘shimcha kema hamda qiruvchi samolyotlarni yuboryapti, deb xabar beradi “Interfaks”.
“Rossiya Ukraina va uning atrofida harbiy ishtirokini kuchaytirishni davom etar ekan, NATO ittifoqchilari o‘z kuchlarini shay holatga keltirmoqda hamda NATOning Sharqiy Yevropaga qo‘shimcha kema va qiruvchi samolyotlar yuborilib, alyans mudofaasini kuchaytirmoqda”, — deyiladi NATO saytida e’lon qilingan bayonotda.
Ta’kidlanishicha, so‘nggi kunlarda NATOga a’zo qator davlatlar qo‘shimcha kuchlar joylashtirilgani yoki endilikda bu ishni amalga oshirishini e’lon qildi. Bayonotga ko‘ra, Daniya Boltiq dengiziga fregat yuboradi va Litvaga NATOning mintaqadagi havo makonini kuzatish missiyasini qo‘llab-quvvatlash uchun to‘rtta F-16 qiruvchi samolyotini yo‘naltiradi. Shuningdek, Ispaniya alyans harbiy-dengiz kuchlariga yordam sifatida kemalarni yubormoqda va Bolgariyaga qiruvchi samolyotlarni jo‘natish imkoniyatini ko‘rib chiqyapti.
Bundan tashqari, Fransiya o‘z qo‘shinlarini NATO qo‘mondonligi ostida Ruminiyaga joylashtirishga tayyorligini bildirgan. AQSh esa Shimoliy Atlantika alyansining sharqiy qismidagi harbiylari sonini oshirish masalasini ko‘rib chiqayotgani aytilmoqda.
NATO, shuningdek, Niderlandiya aprel oyidan boshlab Bolgariyaga ikkita F-35 qiruvchi samolyotini yuborishini kutmoqda. Mamlakat shu bilan birga, NATOning tezkor harakat kuchlari uchun bitta kema va piyoda bo‘linmasini yuborish niyatida.
Ma’lumotlarga ko‘ra, NATOning alyans sharqiy qismida 2014-yilgacha — Rossiya Qrimni qo‘shib olguniga qadar qo‘shinlari bo‘lmagan.
Avvalroq Zelenskiy AQSh davlat kotibi bilan uchrashuvda Ukraina armiyasini modernizatsiya qilishda yordam so‘ragani, Kanada maxsus kuchlarining bir qismi Ukrainaga jo‘natilgani to‘g‘risida xabar berilgandi.
Izoh (0)