AQSh davlat kotibi Entoni Blinken global ko‘lamdagi salbiy oqibatlardan qochish uchun G‘arb Rossiyaning Ukraina va mintaqadagi boshqa davlatlarga nisbatan siyosatiga keskin chora ko‘rishi lozimligini aytdi, deb xabar beradi “Kommersant”.
U Rossiyani “xalqaro munosabatlarning asosiy tamoyillarini” buzishda ayblab, bunga Moskvaning Ukraina, Gruziya va Moldova bilan munosabatlarni misol qilib keltirgan.
Blinkenning aytishicha, “Ukrainaning mustaqillik huquqi bilan bog‘liq xavotirlar bir chetga surib qo‘yilgan taqdirda ham, tinchlik, xavfsizlikni saqlash va mojarolarning oldini olishni ta’minlaydigan xalqaro munosabatlarning asosiy tamoyillari mavjud”.
“Agarda biz xalqaro munosabatlarning ushbu bazaviy tamoyillari buzilishiga yo‘l qo‘ysak, ‘Pandora qutisi’ni ochib yuboramiz va bu butun dunyo uchun xavf tug‘diradi. Bu bizni bo‘linish, mojarolar va hatto eng yomoni — yillar davomida oldini olishga intilgan bundan ham yomonroq vaqtga qaytaradi. Shu sababli tikilgan dov Ukraina taqdiridan yuqori, Yevropaning Rossiya, AQShning Rossiya bilan munosabatlaridan ham yuqori. Bu global oqibatlarni yuzaga keltirishi mumkin”, — deya ta’kidlaydi Blinken.
Moskvaning Ukrainaga nisbatan amaldagi siyosatini u Kiyev “islohotlar va demokratiya yo‘lidan borayotgani” sabab Rossiya uni “butunlay yo‘qotishdan qo‘rqyapti” deb izohlagan.
Blinken Rossiyaning G‘arb bilan munosabatlarida “ikki yo‘l” borligini yana bir bor ogohlantirgan: diplomatiya va “Ukrainaga nisbatan amalga oshirilgan bosqinning oqibatlari”. Davlat kotibining so‘zlariga ko‘ra, AQSh va uning ittifoqchilari birinchisini tanlaydi, Rossiya bilan yaqinda o‘tkazilgan muzokaralar aynan shunga bag‘ishlangan edi. Blinkenning eslatishicha, shu haftada Vashington, shuningdek, NATO Rossiya borasidagi xavotirlarga javob qaytarishi kerak. Moskvaning mazkur hujjatlarga javoban amalga oshiradigan harakati Rossiya diplomatik jarayonni davom ettirish yoki ettirmasligini ko‘rsatadi.
Avvalroq Zelenskiy AQSh davlat kotibi bilan uchrashuvda Ukraina armiyasini modernizatsiya qilishda yordam so‘ragani, Kanada maxsus kuchlarining bir qismi Ukrainaga jo‘natilgani to‘g‘risida xabar berilgandi. Shuningdek, NATO Ukraina atrofidagi vaziyat sabab qo‘shinlarini jangovar shay holatga keltirmoqda.
Izoh (0)