АҚШ президенти Жо Байден, Буюк Британия бош вазири Борис Жонсон, шунингдек, қатор Европа давлатлари етакчилари, Европа Иттифоқи ва НАТО Украина атрофидаги вазиятнинг ривожланишини, жумладан, ҳарбий можаро юзага келса, Россияга қарши санкциялар қўллашни муҳокама қилди, деб хабар беради The Mirror.
Сиёсатчилар онлайн тарзда «Россия тажовузкорлигини», жумладан, Москва учун жиддий иқтисодий харажатларни тайёрлаш ва НАТОнинг шарқий қаноти мудофаасини кучайтириш йўлидаги саъй-ҳаракатларни муҳокама қилган.
Учрашув якунлари бўйича Украинага «ҳужум» уюштирилса, Россияга қарши «мисли кўрилмаган санкциялар пакетини» жорий этиш зарурлиги бўйича қарор қабул қилинган. Шу билан бирга, етакчилар дипломатик музокаралар «биринчи даражали вазифа» эканини қайд этган. «Шунингдек, улар халқаро ҳамжамият Украина суверенитетига путур етказадиган ҳар қандай ҳаракатга тоқат қилмаслик кераклиги ҳақида келишиб олди», — дея қўшимча қилади Британия бош вазири матбуот хизмати.
Эслатиб ўтамиз, Украина билан чегарада Россия қўшинларининг тўплангани ҳақидаги маълумотлар октябрь ойида ғарб ОАВларида пайдо бўлишни бошлаган. Ноябрь ойи ўрталарида Украина президенти Владимир Зеленский чегарада 100 минг Россия қўшини борлигини маълум қилган. АҚШ Давлат котиби ўринбосари Виктория Нуланд Россиянинг Украинага «бостириб кириши» 2022 йил бошида содир бўлиши мумкинлигини айтган.
Москва бу маълумотларни рад этиб, Украинадаги ҳарбий ҳаракатларга тайёргарлик ҳақидаги хабарларни «қуруқ, асоссиз кескинлик» деб атамоқда. Қолаверса, Россия ғарб давлатларидан НАТОнинг шарққа томон кенгаймаслиги, Украина эса бу ташкилотга қабул қилинмаслиги ҳақида кафолат талаб қилган.
Вашингтон бир неча бор АҚШ ва иттифоқчилари Украина атрофида вазият кескинлашган тақдирда, Россияга қарши санкциялар жорий этишга тайёрлигини билдирган. Аввалроқ Оқ уй матбуот котиби Жен Псаки Россия Украинага бостириб кирган тақдирда, Вашингтон унга қарши илгари эълон қилинган санкцияларнинг бирортасини, жумладан, SWIFT банклараро маблағ ўтказиш тизимидан узиб қўйиш вариантини ҳам истисно қилмаслигини айтган. The Telegraph маълумотларига кўра, «Шимолий оқим-2» газ қувурига қарши санкциялар жорий этилиши ҳам мумкин. Шу билан бирга, Handelsblatt нашри ҳукуматдаги манбаларига таяниб, Қўшма Штатлар ва Европа Иттифоқи давлатлари Россияни SWIFT тизимларидан узиб қўйиш имкониятини кўриб чиқишдан бош тортганини маълум қилган.
Изоҳ (0)