Gruziyada so‘nggi bir-kecha kunduzda yana 7521 nafar kishida koronavirus aniqlandi. Bu 2021-yilning avgustidan keyingi eng yuqori ko‘rsatkich, o‘shanda COVID-19 ga chalinish antirekordi 6208 kishini tashkil qilgandi.
Gruziya Sog‘liqni saqlash vazirligining Kasalliklarni nazorat qilish va sog‘liqni saqlash milliy markazi ma’lumotlariga ko‘ra, 24 soat ichida mamlakatda koronavirusdan 31 nafar bemor vafot etgan, 3160 kishi tuzalgan.
Mamlakatda infeksiya yuqtirganlarning umumiy soni 1 million kishidan oshdi, tuzalganlar — 934 667 kishini, kasallikdan vafot etganlar 14 512 kishini tashkil etmoqda.
15-martdan beri Gruziyada aholi Pfizer, Sinopharm va Sinovac Biotech dori vositalari bilan koronavirusga qarshi emlanmoqda. Shu vaqtga qadar aholining 41,7 foizi to‘liq emlangan.
“Korrespondent.net” xabariga ko‘ra, Kanada Pfizer kompaniyasidan COVID-19 ni davolashda qo‘llanadigan tabletkalarining birinchi partiyasini qabul qilib oldi.
“Davlat xaridlariga oldindan strategik yondashuvimiz sharofati bilan Kanada Paxlovid(tabletka nomi)ning 30 ming kursini o‘z ichiga olgan birinchi partiyani qabul qilib oldi”, — dedi mamlakat sog‘liqni saqlash vaziri Jan-Iv Duklo.
Uning so‘zlariga ko‘ra, mart oyi oxirigacha ushbu dorining yana 120 ming kursi mamlakatga keltiriladi.
“Shuningdek, dorining qo‘shimcha dozalarini Kanadaga imkon qadar tezroq yetkazib berishni ta’minlash uchun Pfizer bilan uzoq muddatli ta’minot jadvalini yaratish ustida ishlamoqdamiz”, — deya qo‘shimcha qilgan vazir.
Kanada SVV rahbari hech qanday dori, jumladan Paxlovid ham emlanish va sog‘liqni saqlash choralarining o‘rnini bosolmasligini ta’kidlagan.
Mavzuga doir:
Izoh (0)