Rossiya Qurolli Kuchlarining “Ittifoqchilik jasorati” qo‘shma o‘quv mashg‘ulotlarida ishtirok etadigan ilk bo‘linmalari Belarusga yetib keldi. Bu haqda respublika Mudofaa vazirligi xabar berdi.
“Ittifoq davlatining javob qaytarish kuchlarini tekshirish bo‘yicha tasdiqlangan rejaga muvofiq, Belarus hududiga Rossiya Qurolli Kuchlarining bo‘linmalari kela boshladi”, — deyiladi vazirlik matbuot xizmati xabarida.
Idoraning tushuntirishicha, “tekshiruv qo‘qqisdan bo‘lgani sabab” qo‘shinlar Rossiyadan mashg‘ulotlarning birinchi bosqichi davomida keladi.
Bo‘linmalar kelib bo‘lgach, o‘quv mashg‘ulotlari amalga oshiriladigan hudud tomon harakatlanadi.
Ta’kidlanishicha, mashg‘ulotlar 10—20-fevral kunlari bo‘lib o‘tadi. Birinchi bosqichda 9-fevralga qadar qisqa muddatda xavf ostida qolgan yo‘nalishlarda qo‘shinlarni qayta joylashtirish va guruhlarni shakllantirish masalalarini ishlab chiqish rejalashtirilgan. Ikkinchi bosqichda esa “Ittifoqchilik jasorati” qo‘shma mashg‘ulotlari o‘tkaziladi.
Avvalroq Rossiya—Belarus harbiylari o‘rtasidagi qo‘shma o‘quv mashg‘ulotlar 2022-yilning fevralida o‘tkazilishi to‘g‘risida xabar berilgandi. Belarus prezidenti Aleksandr Lukashenko 17-yanvar kuni Minskda o‘tkazilgan yig‘ilishda qo‘shma o‘quv mashg‘ulotlari fevralda boshlanishini ma’lum qilgan. Shuningdek, uning so‘zlariga ko‘ra, Boltiqbo‘yi davlatlari va Polshaning o‘n minglab harbiy xizmatchilari e’tibori Belarus chegarasiga qaratilgan.
Izoh (0)