Rossiya Ukrainadan diplomatlarini evakuatsiya qilmoqchi — NYT

Rossiyaning Ukrainadagi ikkita konsulxonasi diplomatlariga mamlakatni tark etishga tayyorlanish buyurildi. Bu haqda The New York Times gazetasi Ukraina xavfsizlik xizmatining yuqori lavozimli amaldoriga tayanib xabar berdi.

Shu bilan birga, nashr manbasining ta’kidlashicha, 5-yanvar kuni Ukrainani, asosan, rossiyalik diplomatlarning bolalari va rafiqalaridan iborat 18 kishi tark etgan. Yaqinda Kiyev va Lvovdagi konsulxonalardan yana 30 ga yaqin odam ketadi, deya qo‘shimcha qildi manba.

AQSh rasmiy vakili Vashingtonning evakuatsiyaga tayyorgarlikdan xabari borligini aytdi. “Bizda Rossiya hukumati dekabr oyi oxiri va yanvar oyi boshida Ukrainadagi elchixonasidan diplomatlarning oila a’zolarini evakuatsiya qilishga tayyorgarlik ko‘rgani haqida ma’lumotlar bor”, — deyiladi bayonotda.

Shuningdek, unda ta’kidlanishicha, Rossiya prezidenti Vladimir Putin Ukrainaga “bosqin uyushtirish” yuzasidan hali yakuniy qarorga kelmagan.

Keyinroq Rossiya tashqi ishlar vazirligi dilpomatlarni evakuatsiya qilishga tayyorgarlik haqidagi xabarga munosabat bildirdi.

“Rossiyaning Kiyevdagi elchixonasi odatiy rejimda ishlamoqda”, — deyiladi vazirlikning javobida.

Ukraina chegaralaridagi vaziyat 2021-yilning kuzida, bir qancha xorijiy OAV Rossiya Ukrainani bosib olishga tayyorlanayotgani haqida xabar tarqatganidan so‘ng keskinlashdi. Kreml bir necha bor barcha ayblovlarni rad etib, Rossiya hududi bo‘ylab qo‘shinlarning harakatlanishi uning ichki ishi ekanini ta’kidlagan. Rossiya prezidenti Vladimir Putin, o‘z navbatida, Rossiya chegaralari yaqinida NATOning faolligi ortgani haqida gapirgan.

Dekabr oyi o‘rtalarida Rossiya Tashqi ishlar vazirligi AQSh va NATOga xavfsizlik kafolatlari bo‘yicha takliflar yuborgandi. Ularda alyansni sharqqa tomon kengaytirmaslik, xususan, Ukraina va Gruziyani NATOga qabul qilmaslik majburiyati haqidagi band bor edi. Ushbu masalalar bo‘yicha 10 va 12-yanvar kunlari Rossiyaning Vashington va NATO bilan muzokaralari bo‘lib o‘tdi. Rossiya tashqi ishlar vaziri o‘rinbosari Sergey Ryabkov muvaffaqiyatsiz yakunlanganini ma’lum qildi.