Arab koalitsiyasining Yaman poytaxti Sano shahriga amalga oshirgan zarbalari oqibatida kamida 23 kishi halok bo‘ldi. Halok bo‘lganlar orasida ayollar va bolalar ham bor. Shuningdek, beshta turar joy binosi vayron bo‘lgan, deb xabar beradi “TASS”.
Ma’lum qilinishicha, zarbalar “Ansar Alloh” xusiylar harakati tomonidan BAA hududiga berilgan zarbalarga javob tarzida amalga oshirilgan. Koalitsiya xabarida ta’kidlanishicha, zarbalar “terrorchilarning yetakchilariga” qaratilgan va “harbiy zarurat” bilan qo‘zg‘atilgan.
“Koalitsiyaning harbiy-havo kuchlari Sano uzra kun-u tun operatsiyalarni o‘tkazmoqda. Tinch aholini o‘z xavfsizliklari uchun harbiy lagerlar va xusiylar yig‘inlaridan uzoqroqda bo‘lishga chaqiramiz”, — deyiladi koalitsiya bayonotida.
Ta’kidlanishicha, F-15 qiruvchi-bombardimoni BAAga nisbatan zarbalarni berishda foydalanilgan ikkita ballistik raketa uchirish moslamasini yo‘q qilgan. Shuningdek, ma’lum qilinishicha, shahar g‘arbidagi “Ansar-Alloh” xusiylari tomonidan ushlab turilgan El-Libi dahasiga ham havodan hujumi amalga oshirilgan. Beshta uy vayron bo‘lgani, yana o‘nlab binolarga zarar yetgani aytilmoqda. Vayronalar ostida odamlar qolib ketgan bo‘lishi mumkin.
Avvalroq Yamanning Marib shahriga amalga oshirilgan raketa zarbalari oqibatida 29 kishi halok bo‘lgani to‘g‘risida xabar berilgandi.
Yamandagi mojarolar 2014-yildan beri davom etmoqda. Harbiy ziddiyatlar 2015-yilning mart oyida Saudiya Arabistoni boshchiligidagi koalitsiya kuchlarining respublika prezidenti Mansur Hodiy tarafiga kelib qo‘shilganidan so‘ng kuchaydi. Ularga Eron tomonidan qo‘llab-quvvatlanayotgan “Ansar Alloh” harakati tarkibiga kiruvchi yamanlik isyonchilar qarshilik ko‘rsatmoqda.
Eslatib o‘tamiz, 2020-yilning iyulida Yaman markaziy hukumati va Janubiy o‘tish davri kengashi separatistlari yangi hukumat tuzishga rozi bo‘lgandi. Shu orqali Yaman Saudiya Arabistonining mojaroni tartibga solish va o‘t ochishni to‘xtatish rejimi borasidagi tashabbusini qo‘llab-quvvatlagan. Dekabr o‘rtalarida bosh vazir Main Abdul Malik boshchiligida hukumat shakllantirilgan. 26-dekabr kuni yangi hukumat prezident Mansur Hodiyga qasamyod keltirgan.
Janubiy o‘tish davri kengashi 2017-yilda tuzilgan. Bir qancha muddat ular Yamanning tan olingan hukumati bilan birgalikda “Ansar Alloh” xusiylar harakatiga qarshi kurashib kelgan, biroq keyinchalik o‘rada mojaro yuzaga kelgan. 2019-yilda separatistlar Aden shahrini egallab olgan, 2020-yilning aprelida esa Yamanning barcha janubiy viloyatlarida o‘z o‘zini boshqarish rejimini joriy etgan.
Izoh (0)