Avstraliya terapevtik mahsulotlar boshqarmasi (TGA) “Sputnik V” vaksinasining ikkala dozasi bilan emlangan fuqarolar mamlakatga kirish huquqiga ega ekanini ma’lum qildi, deb xabar beradi “Interfaks”.
Ta’kidlanishicha, mazkur qaror TGA’ga Rossiya hukumati tomonidan Moskvaning Avstraliyadagi elchixonasi yordamida taqdim etgan ma’lumotlari asosida qabul qilingan.
Unda aytilishicha, “ ‘Sputnik’ning tan olinishi xorijlik talabalarning qaytishini, shuningdek, mutaxassis va nomutaxassis bo‘lgan ishchilarning Avstraliyaga kelishini, ishbilarmonlar va sport vakillarining mamlakatga tashriflarini kengaytirishga imkon beradi”.
Avvalroq JSSTning Rossiyadagi vakili Melita Vuynovich Rossiya to‘g‘ridan to‘g‘ri investitsiyalar jamg‘armasi “Sputnik V”ni tasdiqlash tartibini davom ettirish uchun zarur bo‘lgan barcha hujjatlarni Jahon sog‘liqni saqlash tashkilotiga topshirganini ma’lum qilgandi.
Eslatib o‘tamiz, 2021-yil may oyida Rossiyaning “Sputnik V” vaksinasini O‘zbekistonda ishlab chiqarishni yo‘lga qo‘yish bo‘yicha kelishuvga erishilgani ma’lum qilingan edi. O‘zbekiston tomoni bunday taklif bilan 2020-yilning dekabridayoq chiqqan va ishlab chiqarish maydonchasi sifatida Tashkent Pharma Park hududini taklif qilgandi.
Rossiya Xavfsizlik kengashi kotibi o‘rinbosari Rashid Nurgaliyev 26-iyul kuni “Rossiyskaya gazeta”ga bergan intervyusida O‘zbekiston yaqin orada Rossiyaning “Sputnik V” vaksinasini ishlab chiqarishni yo‘lga qo‘yishni rejalashtirayotganini ma’lum qilgandi. O‘zbekiston dori vositasi ishlab chiqariladigan hududni ham tanlaganini ham aytgandi.
Avgust oyi oxirida O‘zbekiston hukumati Jurabek Laboratories kompaniyasida ishlab chiqarilgan ZF-UZ-VAC2001 va “Sputnik V” vaksinalarini davlat ro‘yxatidan o‘tkazishga ruxsat bergan edi. Sentabr o‘rtalarida esa O‘zbekistonda ishlab chiqarilgan “Sputnik V” vaksinasi oktabr oyida ichki bozorga chiqarilishi ma’lum bo‘lgandi. 12-oktabr kuni Jurabek Laboratories MChJ qo‘shma korxonasida ishlab chiqarilayotgan “Sputnik V” vaksinasi 1 va 2 komponentlarining dastlabki 260 500 dozasi Sanitariya-epidemiologik osoyishtalik va jamoat salomatligi xizmatiga topshirilgandi.
Izoh (0)