Rossiyada ishlamoqchi bo‘lgan o‘zbekistonliklarga qurilish sohasida 10 mingta ish o‘rni taklif etilgani, ularni mamlakat hududida tibbiy ko‘rikdan o‘tkazishni tashkil etish uchun tibbiy asbob-uskunalar bilan Rossiyaning 40 nafar tibbiyot xodimi O‘zbekistonga kelgani to‘g‘risida xabar berilgandi. SSV matbuot xizmatining ma’lum qilishicha, ishlash uchun jalb qilinayotgan fuqarolar yangi turdagi “Sputnik Layt” vaksinasi bilan emlanadi.

Ma’lum qilinishicha, nomzodlarni ishga jalb qilish, tibbiy ko‘rikdan o‘tkazish, emlash, rus tili va Rossiya qonunchiligi bo‘yicha imtihon topshirish, patent rasmiylashtirish va transport xarajatlari — ish beruvchilar tomonidan qoplanadi.

Ta’kidlanishicha, Rossiya Sog‘liqni saqlash vazirligi tomonidan mehnat migrantlarini emlash uchun yangi turdagi “Sputnik Layt” (Sputnik Light) vaksinasining 12 ming dozasi O‘zbekistonga olib kelingan. “Sputnik Layt” bir komponentli vaksina bo‘lib, u bilan to‘liq emlanish uchun vaksinaning bir dozasini olish kifoya qiladi.

Ushbu vaksina bilan faqat O‘zbekistondan yuborilishi mo‘ljallangan 10 ming nafar quruvchi migrantlar emlanadi. Vaksinatsiya jarayoni rossiyalik tibbiyot xodimlari tomonidan amalga oshiriladi.  Emlash jarayonlari tez orada boshlanishi kutilmoqda.

Avvalroq O‘zbekistonda “Sputnik V” vaksinasining dastlabki partiyasi ishlab chiqarilgani to‘g‘risida xabar berilgandi. Jurabek Laboratories MChJ qo‘shma korxonasida ishlab chiqarilayotgan vaksinaning i 1- va 2- komponentlarining dastlabki 260 500 dozasi Sanitariya-epidemiologik osoyishtalik va jamoat salomatligi xizmatiga topshirilgan.