Ukraina Raqamli transformatsiya vazirligi hukumat saytlariga uyushtirilgan kiberhujumga Rossiyaning aloqadorligi haqida dalillar borligini ma’lum qildi. Bu haqda boshqarma saytida aytilgan.
“Bugungi kunga kelib shuni aytish mumkinki, barcha dalillar kiberhujum ortida Rossiya turganiga ishora qilmoqda. Moskva gibrid urushni davom ettirib, axborot va kibermakonda o‘z kuchlarini faol ravishda oshirmoqda. So‘nggi kiberhujum Ukrainaga qarshi Rossiyaning 2014-yildan beri davom etayotgan gibrid urushining bir ko‘rinishi”, — deyiladi vazirlik bayonotida.
Vazirlik ma’lumotlariga ko‘ra, hujumdan maqsad Ukrainadagi vaziyatni beqarorlashtirish va mamlakat aholisining hokimiyatga bo‘lgan ishonchiga putur yetkazishdir.
Kiberhujumda Rossiyaning ishtiroki borligini aynan qanday dalillar tasdiqlashiga aniqlik kiritilmagan.
14-yanvarga o‘tar kechasi Ukraina hukumati veb-saytlariga keng ko‘lamli xakerlar hujumi uyushtirildi. Ukraina xavfsizlik xizmati ma’lumotlariga ko‘ra, jami 70 ga yaqin veb-saytlar, jumladan, Ukraina Tashqi ishlar vazirligi va Ta’lim vazirligi manbalari ham hujumga uchragan. Shu bilan birga, hech qanday ma’lumot o‘g‘irlanmagan, kontent buzilmagan, saytlarning ishi bir necha soat ichida tiklangan.
Ukraina hukumati dastlab, kiberhujumni kim amalga oshirganini to‘g‘ridan tog‘ri aytmasdan, bu Rossiya maxsus xizmatlari bilan aloqador xakerlarning ishi bo‘lishi mumkinligiga shama qilgan. Rossiya prezidentining matbuot kotibi Dmitriy Peskov esa buni Rossiyaga qarshi yana bir asossiz ayblov deb atagan.
“Biz buni Rossiyaga qarshi asossiz ayblovlarning davomi deb bilamiz. Ukrainaliklar hamma narsada, hatto ularda ob-havo aynisa ham bunga Rossiyani ayblashiga deyarli o‘rganib qolganmiz”, — degan Rossiya prezidentining matbuot kotibi.
Ukraina hukumati saytlariga qilingan hujumlardan so‘ng, Yevropa Ittifoqi mamlakatlari 15-yanvar kuni kiberhujumlarga qarshi kurash bo‘yicha olti haftalik mashg‘ulotlarni boshladi.
Izoh (0)