O‘zbekistondagi Jurabek Laboratories farmatsevtika kompaniyasi Rossiyaning koronavirusga qarshi “Sputnik V” vaksinasini seriyali ishlab chiqarishni boshladi. Bu haqda kompaniya marketing va sotish bo‘limi boshlig‘i Aziz Soipovga tayanib “Gazeta.uz” ma’lum qildi.
Qayd etilishicha, vaksina oktabr oyida ichki bozorga chiqadi. Aziz Soipovning aniqlik kiritishicha, sifatni nazorat qilish uchun seriyali ishlab chiqarish vaksinasining namunalari preparatni ishlab chiquvchi — N. F. Gamaleya nomidagi Milliy epidemiologiya va mikrobiologiya ilmiy markaziga, shuningdek, Farmatsevtika tarmog‘ini rivojlantirish agentligining Dori vositalari, tibbiy buyumlar, tibbiy texnika ekspertizasi va standartlashtirish davlat markaziga yuborilgan.
“Vaksinani quyish allaqachon boshlangan. Biz har bir seriyani tekshiruvdan o‘tkazish uchun Rossiyaga yuboramiz. Tahlillar taxminan uch hafta davom etadi. Rossiyada va [mahalliy] davlat markaziy laboratoriyasida parallel nazorat mavjud. Javoblar chiqishi bilan biz [vaksinani Sog‘liqni saqlash vazirligiga] jo‘natishimiz mumkin bo‘ladi”, — dedi Aziz Soipov.
Avgust oyi oxirida O‘zbekiston hukumati Jurabek Laboratories kompaniyasida ishlab chiqarilgan ZF-UZ-VAC2001 va “Sputnik V” vaksinalarini davlat ro‘yxatidan o‘tkazishga ruxsat bergan edi.
Zavod oyiga 2 million doza “Sputnik V” vaksinasini ishlab chiqarishga imkoniyat beradi.
