Germaniyada koronavirusga qarshi kurashish maqsadida joriy etilgan cheklovlar va vaksinatsiyaga qarshi navbatdagi norozlik namoyishlari bo‘lib o‘tdi, deb xabar beradi DPA. Ammo bu safar ko‘chalarga namoyishchilarga qarshi bo‘lgan fuqarolar ham to‘plangan.
Xususan, Gamburgda sud emlanishga qarshi bo‘lganlarning namoyish o‘tkazishini taqiqlagan, shuningdek, apellyatsiya ham rad etilgan, shunga qaramay 3 mingga yaqin odam norozilik namoyishlari uchun to‘plangan. Avvaliga tashkilotchilar ularning sonini 15 ming deb ko‘rsatgan. Shu bilan birga, mingga yaqin odam namoyishchilarga qarshi aksiyaga to‘plangan bo‘lib, ular “konspirologik mafkuralarga qarshi birdamlik va mar’ifatni qo‘llab-quvvatlash” tarafi chiqish qilgan.
Bundan tashqari, Freyburgda hukumatning koronavirus siyosatiga qarshi 6 mingga yaqin norozilik namoyishchisi to‘plangan — ularga qarshi aksiya o‘tkazganlar soni esa kamroq.
Shu bilan birga, ikki guruh namoyishchilar o‘rtasida mojaro yuzaga kelmasligi uchun shaharlarga politsiya kuchlari jalb etilgan.
Shuningdek, Dyusseldorfda majburiy vaksinatsiyaga qarshi shiorlar ostida 7 mingga yaqin odam ko‘chaga chiqqan, miting tinch o‘tgani aytilmoqda. O‘nlab holatlarda niqob taqmagan fuqarolar jarimaga tortilgan, yonida pichoq ko‘tarib yurganlar qo‘lga olingan.
O‘z navbatida, Konstitutsiyani himoya qilish bo‘yicha federal idora rahbari Tomas Xaldenvang hukumat siyosatiga qarshi norozilik bildirayotganlar tomonidan yangi xavf borligini ma’lum qilgan. Amaldorning aytishicha, ushbu fuqarolarni aniq o‘ng yoki so‘lchilar deb tasniflab bo‘lmaydi, ular muayyan mafkura bilan birlashtirilmaydi, lekin ular uchun demokratik institutlar va hokimiyat vakillariga nisbatan nafrat umumiy hisoblanadi.
“Mavzudan qat’i nazar — koronavirus, migratsiya siyosati yoki falokatli suv toshqinlari bo‘lsin — ushbu odamlarning ayrimlari davlat uddalay olmayotgani va hech narsa qilmayotgani to‘g‘risida tasavvurni paydo qilishga urinadi”, — deydi Xaldengvang.
Avvalroq Belgiya va Chexiyada koronavirus cheklovlariga qarshi norozilik aksiyasi bo‘lib o‘tgani to‘g‘risida xabar berilgandi. Xususan, Bryusselda bir necha ming kishi qo‘llariga majburiy vaksinatsiyaga qarshi plakatlarni ko‘tarib olgan holda Yevropa dahasiga qadar marsh yurgan.
Izoh (0)