Австралия терапевтик маҳсулотлар бошқармаси (TGA) «Спутник V» вакцинасининг иккала дозаси билан эмланган фуқаролар мамлакатга кириш ҳуқуқига эга эканини маълум қилди, деб хабар беради «Интерфакс».
Таъкидланишича, мазкур қарор TGA’га Россия ҳукумати томонидан Москванинг Австралиядаги элчихонаси ёрдамида тақдим этган маълумотлари асосида қабул қилинган.
Унда айтилишича, « ‘Спутник’нинг тан олиниши хорижлик талабаларнинг қайтишини, шунингдек, мутахассис ва номутахассис бўлган ишчиларнинг Австралияга келишини, ишбилармонлар ва спорт вакилларининг мамлакатга ташрифларини кенгайтиришга имкон беради».
Аввалроқ ЖССТнинг Россиядаги вакили Мелита Вуйнович Россия тўғридан-тўғри инвестициялар жамғармаси «Спутник V»ни тасдиқлаш тартибини давом эттириш учун зарур бўлган барча ҳужжатларни Жаҳон соғлиқни сақлаш ташкилотига топширганини маълум қилганди.
Эслатиб ўтамиз, 2021 йил май ойида Россиянинг «Спутник V» вакцинасини Ўзбекистонда ишлаб чиқаришни йўлга қўйиш бўйича келишувга эришилгани маълум қилинган эди. Ўзбекистон томони бундай таклиф билан 2020 йилнинг декабридаёқ чиққан ва ишлаб чиқариш майдончаси сифатида Tashkent Pharma Park ҳудудини таклиф қилганди.
Россия Хавфсизлик кенгаши котиби ўринбосари Рашид Нургалиев 26 июль куни «Российская газета»га берган интервьюсида Ўзбекистон яқин орада Россиянинг «Спутник V» вакцинасини ишлаб чиқаришни йўлга қўйишни режалаштираётганини маълум қилганди. Ўзбекистон дори воситаси ишлаб чиқариладиган ҳудудни ҳам танлаганини ҳам айтганди.
Август ойи охирида Ўзбекистон ҳукумати Jurabek Laboratories компаниясида ишлаб чиқарилган ZF-UZ-VAC2001 ва «Спутник V» вакциналарини давлат рўйхатидан ўтказишга рухсат берган эди. Сентябрь ўрталарида эса Ўзбекистонда ишлаб чиқарилган «Спутник V» вакцинаси октябрь ойида ички бозорга чиқарилиши маълум бўлганди. 12 октябрь куни Jurabek Laboratories МЧЖ қўшма корхонасида ишлаб чиқарилаётган «Спутник V» вакцинаси 1 ва 2 компонентларининг дастлабки 260 500 дозаси Санитария-эпидемиологик осойишталик ва жамоат саломатлиги хизматига топширилганди.
Изоҳ (0)