“Chelsi” hujumchi Romelu Lukakuni sotib yuborishga tayyor, deb xabar beradi El Nacional.
Manba bergan xabarga ko‘ra, klub xo‘jayini Roman Abramovich futbolchining so‘nggi intervyusidan darg‘azab. Lukaku o‘sha intervyusida jamoadagi vaziyatdan noroziligini bildirgan va “Inter”ga qaytish istagi borligi haqida gapirgan, hatto ijtimoiy tarmoqdagi sahifasiga Milan klubi futbolchisi ekanini yozib qoldirgandi. Shundan so‘ng belgiyalik bu qilmishi uchun uzr so‘radi, biroq Abramovich hamon uni sotish haqida o‘ylayapti.
Hozirda futbolchiga “PSJ” qiziqish bildirmoqda. Nashrning yozishicha, parijliklar Romelu uchun 90 million yevro to‘lashga tayyor. “Chelsi” futbolchi uchun sarflangan pulning katta qismini qoplansa, uni sotishi mumkin.
Ma’lumot uchun, Lukaku 2021-yilning yozida “Inter”dan 115 million evaziga ko‘chib o‘tgandi. 28 yoshli futbolchi 2021/22-yilgi mavsumda barcha musobaqalar doirasida 20 ta o‘yin o‘tkazib, 8 ta gol va 2 ta golli uzatmaga mualliflik qildi. Uning “aristokratlar” bilan imzolagan shartnomasi 2026-yilning yoziga qadar amal qiladi.
Izoh (0)