“Paxtakor”ga yangi bosh murabbiy tayinlandi, Toshkent klubini yana xorijlik mutaxassis boshqaradi

“Paxtakor” futbol klubi Slavche Voyneski bilan shartnoma imzolanganini e’lon qildi.

Klub matbuot xizmatining yozishicha, shimoliy makedoniyalik 47 yoshli mutaxassis bilan 2022-yil oxiriga qadar mo‘ljallangan shartnoma imzolangan. Shuningdek, bitimning tomonlarning xohishi bilan mavsum davomida uzaytirilishi mumkinligi qo‘shimcha qilingan.

Ma’lumot uchun, UEFAning Pro litsenziyasiga ega Voyneski Shimoliy Makedoniyada turli toifadagi yoshlar terma jamoalarida uzoq muddatli faoliyati bilan tanilgan. U 1999—2004-yillar oralig‘ida o‘smirlar va yoshlar terma jamoalarida ishlagan. 2004—09-yillarda esa milliy terma jamoada yordamchi murabbiy sifatida mehnat qilgan. Asosan Srechko Katanes va Drago Kanatlarovskiga yordam bergan. Shundan keyin Turkiyada “Elazigspor”, “Genchlerbirligi”, “Gaziantepspor” va “Rizespor” klublari murabbiylar shtabida faoliyat olib borgan. 2019-yil Slovakiyaning “Sered” klubida bosh murabbiy sifatida ishlagan.

Avvalroq “Paxtakor” “Daryo”ga jamoaning niderlandiyalik bosh murabbiyi Piter Hyuistra bilan hamkorlik davom ettirilmasligini ma’lum qilgandi.