O‘zbekistondagi Oliy ta’lim muassasalari talabalari, akademik litsey va hunar maktablari o‘quvchilari uchun qishki ta’til muddati 24-yanvarga qadar uzaytirilgani to‘g‘risida xabar berilgandi. Oliy va o‘rta maxsus ta’lim vazirligining ma’lum qilishicha, 11-yanvarigacha bo‘lgan muddatga xarid qilingan avia va temiryo‘l chiptalari bepul tarzda tegishli muddatga almashtirib berilmoqda.
Ta’kidlanishicha, ayni vaqtda ijtimoiy tarmoqlar orqali vokzallardagi temiryo‘l kassalarida katta navbatlar yuzaga kelgan va bu temiryo‘l kassalarida chipta sotuvida ayrim noqulayliklar keltirib chiqarmoqda. Shu sababli vazirlik talabalar va ularning yaqinlariga murojaat qilib, temiryo‘l chiptalari tarif qismidan 50 foiz miqdorida chegirma berilishi muddati ham, 11-yanvargacha bo‘lgan davrga xarid qilingan avia va temiryo‘l chiptalarini bepul tarzda almashtirib berish muddati ham 2022-yilning 24-yanvariga qadar uzaytirilganini yana bir bor eslatib o‘tgan.
“Shunday ekan, aziz talabalar, hurmatli ota-onalar, 24-yanvarga qadar zaxirangizda qariyb 17 kun bor. Barcha talabalarning 11-yanvargacha bo‘lgan davrga xarid qilingan temiryo‘l chiptalari to‘liq bepul tarzda almashtirib beriladi. Ehtiyojdan kelib chiqib, qo‘shimcha yo‘lovchi poyezdlar qatnovi ham yo‘lga qo‘yilishi rejalashtirilgan”, — deyiladi xabarda.
Shuningdek, chiptalarni joylardagi (shahar, tuman) temiryo‘l kassalaridan ham almashtirish imkoni mavjud.
Eslatib o‘tamiz, O‘zbekistonda talaba va o‘quvchilar uchun qishki ta’til 25-dekabrdan boshlangan edi. Ta’til 2022-yilning 10-yanvarigacha davom etishi va dars jarayonlari 11-yanvardan boshlanishi belgilangandi.
Izoh (0)