O‘zbekiston Rossiyaga tabiiy gaz eksportini qayta tiklashni rejalashtirmayapti. Bu haqda Energetika vazirligi matbuot xizmatiga tayanib, “Gazeta.uz” xabar berdi. Koronavirus pandemiyasi ta’siri doirasida Rossiyaga gaz eksportini to‘liq to‘xtatish hamda Xitoyga yetkazib berishni uch barobar qisqartirish 2020-yilning iyulidayoq ma’lum qilingandi.
“Hozirgi vaqtda Rossiyaga gaz eksporti amalga oshirilmayapti va 2022-yil uchun rejalarda ham yo‘q”, — deya ta’kidlagan vazirlik.
2018-yilda O‘zbekiston “Gazprom”ga 3,8 milliard kubometr gaz yetkazib bergan, 2019-yilda esa ta’minotni 4,9 milliard kubometrgacha ko‘paytirgan. 2020-yilga kelib esa gaz yetkazib berishni to‘xtatgan.
Bundan tashqari, “Gazprom” 2020-yildan boshlab O‘zbekistonga turkman gazini yetkazib berishni boshlagan: 2020-yilda 0,9 milliard kubometr yetkazilgan, ushbu ko‘rsatkich 2021-yilning birinchi choragida esa — 1,5 milliard kubni tashkil qilgan.
Eslatib o‘tamiz, 2020-yilning yanvarida bosh vazir Abdulla Aripov tabiiy gazni eksport qilishni to‘xtatilishini ma’lum qilgandi. Hukumat rahbari 2025-yilga borib tabiiy gazni qayta ishlab, qo‘shimcha qiymatli mahsulotlar ishlab chiqarishni kengaytirish choralari ko‘rilishini bildirgandi. Oktabr oyida prezident “Geologiya-qidiruv ishlarini yanada rag‘batlantirish va yer qa’ridan foydalanuvchilarga soliq solish tartibini takomillashtirish chora-tadbirlari to‘g‘risida”gi qaroni imzoladi. Unda ko‘ra, O‘zbekistonda tabiiy gaz importi bojxona bojidan ozod qilinadi.
Hozir O‘zbekistondan gaz eksportining deyarli barchasi Xitoy hissasiga to‘g‘ri keladi. O‘zbekiston yanvar-oktabr oylarida Xitoyga umumiy qiymati 601,3 million dollarga teng 2,6 million tonna gaz eksport qilgan. Davlat statistika qo‘mitasi ma’lumotlariga ko‘ra, yanvar—oktabr oylarida O‘zbekiston umumiy qiymati 596,8 mln dollarga teng gaz eksport qilgan, bu esa Xitoy bojxona boshqarmasi tomonidan e’lon qilingan ko‘rsatkich bilan deyarli bir xil.
Izoh (0)