Италия собиқ бош вазири, «Олға, Италия» партиясининг етакчиси Сильвио Берлусконининг президентлик сайловларини дастлабки уч турида ғалаба қозониш эҳтимоллиги жуда кам. Бу ҳақда Американинг The Wall Street Journal газетасига таяниб, «РБК» хабар берди. Ғалаба учун сиёсатчига унга мухолиф бўлган сўл марказчиларнинг қўллаб-қувватлови керак бўлади.
Амалдаги давлат раҳбари Сержо Маттарелланинг президентлик муддати февраль ойида тугайди. Италия президентини етти йил муддатга яширин овоз бериш йўли орқали иккала палата депутатлари ва вилоятлар вакилларидан иборат сайловчилар коллегияси сайлайди. Овоз бериш жараёнларининг дастлабки уч турида сайланиш учун овозларнинг учдан икки қисмини қўлга киритиш керак. Таҳлилчиларнинг ҳисоблашича, бу каби кўпчилик овозини тўплаш имкониятига эга ягона шахс — мамлакатнинг амалдаги бош вазири Марио Драги.
Сайловнинг тўртинчи ва кейинги турларида ғалаба қозониш учун эса 50 фоиз плюс битта овоз тўплаш кифоя. Америка газетасининг ёзишича, бу ерда Берлусконининг имконияти бўлади, аммо Драгининг имконияти ҳам ортади. Овоз беришнинг биринчи тури январь охирида ўтказилиши режалаштирилган.
Нашр маълумотларига кўра, Берлусконини «Италия оғалари» ва «Шимол лигаси» партиялари етакчилари Жоржа Мелони ва Маттео Сальвини қўллаб-қувватлашга тайёр, бироқ уларнинг айрим вакиллари партиялар ўртасидаги келишмовчилик туфайли бошқа номзодларга овоз бериши мумкин.
Берлускони президентликка номзодини қўйиши ҳақида расман эълон қилмаган — бу каби тахминларни ОАВлар сайлов олдидан ёзмоқда. Декабрь бошида Британиянинг The Guardian нашри унинг партияси вакилига таяниб, собиқ бош вазири бу борада «аниқ илҳомлангани» ҳақида ёзган эди. Берлусконининг маслаҳатчиси The Wall Street Journal’га собиқ бош вазири ўз номзодини илгари суриш ёки сурмаслик тўғрисидаги қарорини январь ўрталарида маълум қилади.
Марио Драги декабрь ойида ҳукумат усиз ҳам эплай олишини айтганди — бу унинг президентлик сайловларида иштирок этишга шама қилганини англатган.
Айрим экспертлар Берлускони президентлик сайловларида ғалаба қозоғишига шубҳа билдирган. «Берлускони буни уддалашига ишонмайман, бироқ у билан тахмин қилиш қийин, чунки у барча башоратларни рад этмоқда», — дейди Буюк Британиядаги Суррея университети профессори Даниэль Албертацси.
Эслатиб ўтамиз, 85 ёшли Берлусконида 2021 йилнинг апрелида шифохонага ётқизилганди. Сиёсатчи 6 апрель куни Миланнинг «Сан-Рафаэл» клиникасида назорат текширувидан ўтган, шундан кейин шифокорлар уни кейинги назорат учун шифохонага ётқизганди. Шунингдек, 22 март куни ҳам Берлускони айнан шу шифохонага келтирилган эди. Ўшанда унинг адвокати собиқ бош вазир ва яна бошқа 28 киши коррупция ва ёлғон гувоҳлик бериш айбловлари билан ўтказилаётган Миландаги суд мажлисида мижозининг соғлиғи ёмонлашгани ҳақида хабар берди. 24 март куни эса Берлусконига шифохонадан жавоб берилганди.
Изоҳ (0)