Dunyo va o‘zbek sportiga oid 30-dekabrning eng muhim xabarlari dayjesti bilan tanishing.
O‘zbekiston
Futzal bo‘yicha 2022-yilgi Osiyo chempionati saralashiga Qirg‘iziston mezbonlik qiladi
Osiyo futbol konfederatsiyasi 2022-yili Kuvaytda bo‘lib o‘tadigan futzal bo‘yicha Osiyo Kubogi saralash bosqichiga (Markaziy va Janubiy zona) mezbonlik qiladigan mamlakat nomini e’lon qildi, deb xabar bermoqda O‘FA matbuot xizmati.
Unga ko‘ra, saralash bahslari Qirg‘izistonda o‘tkaziladi. O‘zbekiston futzal milliy terma jamoasi Eron bilan birgalikda 1-savatchadan joy olgan. Terma jamoa Markaziy va Janubiy zona saralashida ishtirok etadi, bahslar 2022-yilning 1—15-aprel kunlari bo‘lib o‘tadi.
Shahzodbek Ubaydullayevning goli jamoasining eng yaxshi goli sifatida qayd etildi
O‘zbekistonlik futbolchi Shahzod Ubaydullayevning Belarus chempionati doirasida “Vitebsk” darvozasiga akrobatik usulda urgan goli “Energetik-BGU”ning 2021-yildagi eng yaxshi goli sifatida qayd etildi.
“Energetik-BGU” Belarus chempionatida 33 ochko bilan musobaqa jadvalida 13-o‘rinni egalladi. Ubaydullayev 2021-yilning boshidan beri Belarus chempionatida harakat qilib kelmoqda (“Shaxtyor Soligorsk”, “Energetik-BGU”) va 14 ta o‘yin o‘tkazib, 3 ta gol va 4 ta golli uzatmaga mualliflik qildi.
Jahon
Levandovski AIPS talqiniga ko‘ra yilning eng yaxshi sportchisi, Messi esa Amerikada tengsiz
Xalqaro sport matbuoti assotsiatsiyasi (AIPS) yilni sarhisob qilmoqda.
Unga ko‘ra, erkaklar o‘rtasida 2021-yilning eng yaxshi sportchisi deb “Bavariya” va Polsha terma jamoasi hujumchisi Robert Levandovski e’tirof etildi.
“PSJ” va Argentina terma jamoasi hujumchisi Lionel Messi esa yil yakuniga ko‘ra Amerika qit’asining eng yaxshi sportchisi bo‘ldi.
Messi yilning eng yaxshi sportchisi nomiga ham da’vogarlik qilgandi, biroq avtopoygachi Maks Ferstappendan ortda qolib, 3-o‘rin bilan kifoyalandi.
“Barselona” Dembele bilan kelisha olmayapti
“Barselona” yarim himoyachisi Usmon Dembelening jamoadagi kelajagi noaniqligicha qolmoqda.
Fransiyalik futbolchi va katalon klubi yangi shartnoma borasida kelisha olishmayapti, deb yozadi Diario Sport.
Ta’kidlanishicha, endilikda klub Dembeleni sotishga harakat qilib ko‘radi. U muzokaralar chog‘ida yiliga 40 million yevro maosh va shartnoma uzaytirilgani uchun qo‘shimcha 20 million yevro bonus so‘ragan.
Hozirda Dembelening “Yuventus” bilan kelishuvga erishgani, shuningdek, “PSJ” va Angliyaning bir qancha klublari qiziqishiga sabab bo‘layotgani haqida xabarlar bor.
Dembelening “Barselona” bilan amaldagi shartnomasi 2022-yilning yozida o‘z nihoyasiga yetadi.
“Barselona”da koronavirusga chalingan futbolchilar soni 10 nafarga yetdi
“Barselona”da koronavirus bilan bog‘liq vaziyat jiddiylashmoqda.
Klub matbuot xizmatining xabar berishicha, 30-dekabr kuni Filippe Koutino, Serjinyo Dest va Abde Ezzalzuli koronavirusga ijobiy test topshirgan.
Shu tariqa “Barselona”da koronavirusga chalingan futbolchilar soni 10 nafarga yetdi. Avvalroq himoyachilar Xordi Alba, Dani Alves, Kleman Langle, Samuel Umtiti va Aleks Balde, shuningdek, yarim himoyachilar Usmon Dembele va Gavi ham virus yuqtirib olgandi.
Hozirda asosiy tarkibdan faqatgina 9 nafar sog‘lom futbolchi qolgan. Jamoa keyingi o‘yinini 2-yanvar kuni “Malyorka”ga qarshi o‘tkazadi.
“Atletiko M”da ham koronavirus bilan bog‘liq muammolar kuzatilmoqda
“Atletiko”ning besh a’zosi koronavirus bilan kasallandi.
Bular: bosh murabbiy Diyego Simeone, futbolchilar Antuan Grizmann, Joau Feliks, Koke va Ektor Errera. Bemorlarda kasallik simptomlarsiz o‘tmoqda va ular izolyatsiya olingan.
“Atletiko” navbatdagi o‘yinini 2-yanvar kuni o‘z maydonida “Rayo Valekano”ga qarshi o‘tkazadi.
Xavi Moratani “Barselona”ga taklif qilmoqchi
“Barselona” “Yuventus”da ijara asosida to‘p surayotgan “Atletiko” hujumchisi Alvaro Morataga qiziqish bildirmoqda.
Marca xabariga ko‘ra, 29 yoshli hujumchining transferi bo‘yicha kelishuv oson bo‘lmaydi, biroq “ko‘k-anorranglilar” bosh murabbiyi Xavi klub rahbariyatidan Moratani zudlik bilan jamoaga olib kelishni so‘ragan. 41 yoshli mutaxassis ispaniyalik futbolchiga aloqaga ham chiqqan.
Morata “Real” akademiyasi tarbiyalanuvchisi hisoblanadi.
“Manchester Siti” APLda ajoyib natija ko‘rsatdi
“Manchester Siti” APLning 20-turida “Brentford”ni mag‘lub etdi (1:0).
Pep Gvardiola jamoasi uchun bu APL doirasida 2021-yildagi 36-g‘alaba bo‘ldi. Shu tariqa jamoa o‘ziga tegishli bo‘lgan liga rekordini yangiladi.
Bundan oldingi natija “Liverpul”ga tegishli edi. “Qizillar” 1982-yilda 33 o‘yinda g‘alaba qozongandi.
Shuningdek, Gvardiola shogirdlari uchun bu liga doirasidagi ketma-ket 10-g‘alaba bo‘ldi. “Shaharliklar” bundan oldin ham uch bor shunday seriya qayd etgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)