Dunyo va o‘zbek sportiga oid 29-dekabrning eng muhim xabarlari dayjesti bilan tanishing.
O‘zbekiston
Jahon chempionligini qo‘lga kiritgan Nodirbek Abdusattorov prezident tomonidan mukofotlandi
O‘zbekiston prezidenti Shavkat Mirziyoyev shaxmatning rapid yo‘nalishi bo‘yicha Polshada o‘tgan Jahon chempionatida g‘olib bo‘lgan Nodirbek Abdusattorovni mukofotlash to‘g‘risidagi farmonni imzoladi.
Farmonga ko‘ra, 17 yoshli o‘zbekistonlik shaxmatchi “Mard o‘g‘lon” davlat mukofoti bilan taqdirlandi hamda prezident ko‘rsatmasi bilan unga Toshkent shahridan 2 xonali xonadon sovg‘a qilinadi.
O‘zbek sportida 2021-yilning eng yaxshilari aniqlandi
Toshkentdagi Hilton mehmonxonasida sport sohasida O‘zbekistonning 2021-yildagi eng yaxshilarini aniqlash marosimi bo‘lib o‘tdi. Unda qator nominatsiyalar bo‘yicha g‘oliblar aniqlandi.
Yilning eng yaxshi sportchisi ikki yo‘nalish bo‘yicha aniqlandi. Muxlislar talqiniga ko‘ra, bokschi Bahodir Jalolov g‘olib bo‘lgan bo‘lsa, ekspertlar og‘ir atletikachi Akbar Jo‘rayevni e’tirof etgan.
“Navbahor” vakili YTH oqibatida halok bo‘ldi
“Navbahor U-18” jamoasi himoyachisi Samandar Yigitaliyev 29-dekabr kuni avtohalokatga uchrab, bevaqt hayotdan ko‘z yumdi. Qator klublar, shuningdek, PFL va O‘FA futbolchining yaqinlariga hamdardlik bildirgan.
Yigitaliyev “Navbahor” yoshlar jamoasida 94-raqam ostida harakat qilardi.
Jahon
“Real” va “Barselona” koronavirusdan aziyat chekmoqda
Katalonlar safida koronavirusga chalingandan soni 7 nafarga yetdi. 29-dekabr kungi ma’lumotlarga ko‘ra, Usmon Dembele, Samyuel Umtiti va Gavida virus aniqlangan.
Avvalroq Xordi Alba, Dani Alves, Kleman Langle va Aleks Balde COVID-19 bilan og‘rigandi.
“Real”da to‘rt nafar futbolchining tahlili infeksiyaga ijobiy xulosa bergan. Bular: darvozabon Tibo Kurtua, yarim himoyachilar Federiko Valverde, Eduardo Kamavinga va hujumchisi Vinisius Junior.
Har ikki jamoa 2-yanvar kuni La Ligada o‘yin o‘tkazadi. “Barselona” “Malyorka” bilan bahs olib borsa, “Real” klubi “Xetafe” maydonida mehmon bo‘ladi.
La Liga karantin qoidalarini kuchaytirdi
Mamlakat koronavirusning keng tarqalishi oqibatida La Liga rahbariyati yangi cheklovlarni kiritdi.
Unga ko‘ra, futbol o‘yinlarida tomoshabinlarning maksimal sig‘imi 100 foizdan 75 foiz tushirilgan. Shuningdek, stadionga tashrif buyuradigan muxlislar tibbiy niqobda bo‘lishi majburiy etib qo‘yildi. Ularga tribunalarda ovqatlanish va tamaki chekish man etilgan, biroq tomoshabinlarga suv ichishga ruxsat beriladi.
Jon Terri “Chelsi”ga qaytdi
Londonliklar afsonasi bundan keyin klub akademiyasida maslahatchi murabbiy sifatida faoliyat olib boradi. U akademiya futbolchilari va murabbiylari bilan ishlaydi.
Mashg‘ulotlardan tashqari Terri hamkasblari bilan fikr almashib boradi, shuningdek, yosh futbolchilar va ularning ota-onalari bilan aloqada bo‘ladi. Jon “Chelsi”dagi yangi ishini yanvar oyidan boshlaydi.
Bunga qadar Terri uch yil davomida “Aston Villa”da yordamchi murabbiy sifatida faoliyat yuritgandi.
“Arsenal” ustozi Mikel Arteta ikkinchi marta koronavirusga yo‘liqdi
“Kanonirlar” matbuot xizmati ispaniyalik mutaxassisda virus aniqlanganini ma’lum qildi. Arteta o‘z uyida izolyatsiyaga olingan. Qayd etish kerak, Mikel 2020-yilning mart oyida ham koronavirus yuqtirib olgandi.
“Arsenal”ning keyingi o‘yini 1-yanvar kuni “Manchester Siti”ga qarshi kechadi. Mutaxassis bu uchrashuvni o‘tkazib yuboradi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)