Дунё ва ўзбек спортига оид 30 декабрнинг энг муҳим хабарлари дайжести билан танишинг.
Ўзбекистон
Футзал бўйича 2022 йилги Осиё чемпионати саралашига Қирғизистон мезбонлик қилади
Осиё футбол конфедерацияси 2022 йили Кувайтда бўлиб ўтадиган футзал бўйича Осиё Кубоги саралаш босқичига (Марказий ва Жанубий зона) мезбонлик қиладиган мамлакат номини эълон қилди, деб хабар бермоқда ЎФА матбуот хизмати.
Унга кўра, саралаш баҳслари Қирғизистонда ўтказилади. Ўзбекистон футзал миллий терма жамоаси Эрон билан биргаликда 1-саватчадан жой олган. Терма жамоа Марказий ва Жанубий зона саралашида иштирок этади, баҳслар 2022 йилнинг 1—15 апрель кунлари бўлиб ўтади.
Шаҳзодбек Убайдуллаевнинг голи жамоасининг энг яхши голи сифатида қайд этилди
Ўзбекистонлик футболчи Шаҳзод Убайдуллаевнинг Беларусь чемпионати доирасида «Витебск» дарвозасига акробатик усулда урган голи «Энергетик-БГУ»нинг 2021 йилдаги энг яхши голи сифатида қайд этилди.
«Энергетик-БГУ» Беларусь чемпионатида 33 очко билан мусобақа жадвалида 13-ўринни эгаллади. Убайдуллаев 2021 йилнинг бошидан бери Беларусь чемпионатида ҳаракат қилиб келмоқда («Шахтёр Солигорск», «Энергетик-БГУ») ва 14 та ўйин ўтказиб, 3 та гол ва 4 та голли узатмага муаллифлик қилди.
Жаҳон
Левандовски АIPS талқинига кўра йилнинг энг яхши спортчиси, Месси эса Америкада тенгсиз
Халқаро спорт матбуоти ассоциацияси (АIPS) йилни сарҳисоб қилмоқда.
Унга кўра, эркаклар ўртасида 2021 йилнинг энг яхши спортчиси деб «Бавария» ва Польша терма жамоаси ҳужумчиси Роберт Левандовски эътироф этилди.
«ПСЖ» ва Аргентина терма жамоаси ҳужумчиси Лионель Месси эса йил якунига кўра Америка қитъасининг энг яхши спортчиси бўлди.
Месси йилнинг энг яхши спортчиси номига ҳам даъвогарлик қилганди, бироқ автопойгачи Макс Ферстаппендан ортда қолиб, 3-ўрин билан кифояланди.
«Барселона» Дембеле билан келиша олмаяпти
«Барселона» ярим ҳимоячиси Усмон Дембеленинг жамоадаги келажаги ноаниқлигича қолмоқда.
Франциялик футболчи ва каталон клуби янги шартнома борасида келиша олишмаяпти, деб ёзади Diario Sport.
Таъкидланишича, эндиликда клуб Дембелени сотишга ҳаракат қилиб кўради. У музокаралар чоғида йилига 40 миллион евро маош ва шартнома узайтирилгани учун қўшимча 20 миллион евро бонус сўраган.
Ҳозирда Дембеленинг «Ювентус» билан келишувга эришгани, шунингдек, «ПСЖ» ва Англиянинг бир қанча клублари қизиқишига сабаб бўлаётгани ҳақида хабарлар бор.
Дембеленинг «Барселона» билан амалдаги шартномаси 2022 йилнинг ёзида ўз ниҳоясига етади.
«Барселона»да коронавирусга чалинган футболчилар сони 10 нафарга етди
«Барселона»да коронавирус билан боғлиқ вазият жиддийлашмоқда.
Клуб матбуот хизматининг хабар беришича, 30 декабрь куни Филиппе Коутино, Сержиньо Дест ва Абде Эззалзули коронавирусга ижобий тест топширган.
Шу тариқа «Барселона»да коронавирусга чалинган футболчилар сони 10 нафарга етди. Аввалроқ ҳимоячилар Хорди Альба, Дани Алвес, Клеман Лангле, Самюэль Умтити ва Алекс Бальде, шунингдек, ярим ҳимоячилар Усмон Дембеле ва Гави ҳам вирус юқтириб олганди.
Ҳозирда асосий таркибдан фақатгина 9 нафар соғлом футболчи қолган. Жамоа кейинги ўйинини 2 январь куни «Мальорка»га қарши ўтказади.
«Атлетико М»да ҳам коронавирус билан боғлиқ муаммолар кузатилмоқда
«Атлетико»нинг беш аъзоси коронавирус билан касалланди.
Булар: бош мураббий Диего Симеоне, футболчилар Антуан Гризманн, Жоау Феликс, Коке ва Эктор Эррера. Беморларда касаллик симптомларсиз ўтмоқда ва улар изоляция олинган.
«Атлетико» навбатдаги ўйинини 2 январь куни ўз майдонида «Раё Валекано»га қарши ўтказади.
Хави Моратани «Барселона»га таклиф қилмоқчи
«Барселона» «Ювентус»да ижара асосида тўп сураётган «Атлетико» ҳужумчиси Альваро Моратага қизиқиш билдирмоқда.
Marca хабарига кўра, 29 ёшли ҳужумчининг трансфери бўйича келишув осон бўлмайди, бироқ «кўк-анорранглилар» бош мураббийи Хави клуб раҳбариятидан Моратани зудлик билан жамоага олиб келишни сўраган. 41 ёшли мутахассис испаниялик футболчига алоқага ҳам чиққан.
Мората «Реал» академияси тарбияланувчиси ҳисобланади.
«Манчестер Сити» АПЛда ажойиб натижа кўрсатди
«Манчестер Сити» АПЛнинг 20-турида «Брентфорд»ни мағлуб этди (1:0).
Пеп Гвардиола жамоаси учун бу АПЛ доирасида 2021 йилдаги 36-ғалаба бўлди. Шу тариқа жамоа ўзига тегишли бўлган лига рекордини янгилади.
Бундан олдинги натижа «Ливерпуль»га тегишли эди. «Қизиллар» 1982 йилда 33 ўйинда ғалаба қозонганди.
Шунингдек, Гвардиола шогирдлари учун бу лига доирасидаги кетма-кет 10-ғалаба бўлди. «Шаҳарликлар» бундан олдин ҳам уч бор шундай серия қайд этганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)