Eng qiyin o‘yin, emotsiyasi chempionlarga xos emasligiga sabab va Karlsenning keskin fikrlariga munosabati. Nodirbek Abdusattorov chempionlikdan keyin matbuot anjumanida qatnashdi

O‘zbekistonlik grossmeyster Nodirbek Abdusattorov 28-dekabr kuni Polshaning Varshava shahrida bo‘lib o‘tgan shaxmat musobaqasining rapid yo‘nalishida g‘oliblikka erishdi va Jahon chempioniga aylandi. Ushbu g‘alabadan so‘ng Nodirbek matbuot anjumanida ishtirok etdi.

Taybreykda o‘ynashini kutmagani haqida

Taybreykda o‘ynashimni kutmagandim, biroq bunga tayyor edim. Men uchun eng muhimi so‘nggi kundagi partiyalarni yutqazmaslik edi va buni uddaladim. So‘nggi tur oldidan ro‘yxatda birinchi o‘rinni egallashim va taybreykka yo‘l olishim mumkinligi haqida bilmagandim.

Jahon chempioni va bu nomga da’vogarlarga qarshi o‘yinlardan keyin eng quvonchli vaziyat haqida

Bugun boshqa o‘ynashim shart emasligi — eng yoqimli tuyg‘u. Juda charchadim, lekin oldinda yana bir musobaqa kutib turibdi (blits bo‘yicha Jahon chempionati), shuning uchun xotirjam bo‘lishning vaqti emas.

So‘nggi turda Yan Kshishtof Duda bilan bo‘lib o‘tgan o‘yin haqida

Bu juda qiyin o‘yin bo‘ldi, juda og‘ir. Chunki partiya boshida juda og‘ir o‘yin namoyish qildim, keyin yomon pozitsiyaga tushib qoldim. Qandaydir mo‘jiza sabab o‘yinni ushlab qoldim, chunki raqibda vaqt kam qolgandi. Omadim chopdi, ushbu musobaqada omad kelmasa g‘alaba qozonish juda qiyin.

Taybreykda Yan Nepomnyashiyga qarshi blits partiyalar haqida

Nepomnyashiy bilan o‘yin odatiy tempda o‘tdi. Rapiddagi to‘qnashuvimizdan so‘ng u yaxshiroq tayyorlangan edi (4-turda shaxmatchilar durang o‘ynagandi), ba’zi vaziyatlarda shunga o‘xshash debyutni takrorladik. Bunday pozitsiyada qoralar bilan o‘ynash va vaziyatni nazorat qilish osonroq.

Endigina 17 yosh bo‘lsa-da, g‘alabadan keyingi ko‘rinishi baxtli odamlarniki kabi emasligi haqida

Juda xursandman. Biroq sezib turganingizdek, juda charchadim va xotirjam tortishning vaqti emas. Sababi oldinda boshqa musobaqa kutib turibdi.

Magnus Karlsenning 4 shaxmatchida ham bir ochko mavjud bo‘lsa-da, taybreykka faqat yuqoridagi ikki o‘rin sohibi chiqqanini “ahmoqona qaror” deb atagani haqida

Bu mening qarorim emas, taybreyk yo‘llanmasini omad tufayli qo‘lga kiritdim.

O‘zini O‘zbekistonning buyuk shaxmatchilari, xususan, Rustam Qosimjonovning izdoshi sifatida ko‘rishi haqida

Yo‘q, bunday muvaffaqiyatlar bilan o‘zimni taqqoslash uchun hali erta. Lekin kelajakda bu haqida jiddiy o‘ylab ko‘rsa bo‘ladi.