Ta’lim inspeksiyasi davlat litsenziyasiga ega bo‘lmagan xorij universitetlar nomini ma’lum qilib, fuqarolarni ogohlikka chaqirdi

Ta’lim sifatini nazorat qilish davlat inspeksiyasi litsenziyaga ega bo‘lmay turib, faoliyat olib borayotgan soxta oliy ta’lim muassasalaridan ogohlantirdi. Bu haqda inspeksiya matbuot kotibi xabar qildi.

Qayd etilishicha, so‘nggi paytlarda ijtimoiy tarmoqlarda litsenziyaga ega bo‘lmagan bir qator tashkilotlar o‘zlarini nodavlat oliy ta’lim tashkilotlari sifatida targ‘ib qilish holatlari uchramoqda. Xususan, “Valley Innovative University”, Samarqand—Koreya xalqaro universiteti, Angren—Koreya internatsional universiteti, Xalqaro Yevropa universiteti va boshqa shu kabi muassasalar tomonidan berilgan diplomlar O‘zbekistonda oliy ta’lim muassasasi diplomi sifatida tan olinmaydi.

Ularning ayrimlari hattoki xorijda ta’lim olayotgan fuqarolarga o‘qishini O‘zbekistonga imtihonsiz ko‘chirish bo‘yicha va’dalar berayotgani aytilmoqda.

Qonun hujjatlarida belgilangan talablarga muvofiq, Ta’lim inspeksiyasidan oliy ta’lim xizmatlari ko‘rsatish uchun litsenziya olmagan nodavlat oliy ta’lim tashkilotlari tomonidan berilgan diplomlar tan olinmaydi.

So‘nggi yillarda nodavlat ta’lim tashkilotlari soni bir necha barobar oshgan. 2018—2020-yillar oralig‘ida litsenziyaga ega bo‘lgan nodavlat oliy ta’lim tashkilotlari soni 13 tani tashkil etgan bo‘lsa, birgina 2021-yilning o‘tgan davri mobaynida 18 ta nodavlat oliy ta’lim tashkiloti faoliyati litsenziyalangan.

Davlat statistika qo‘mitasi ma’lumotlariga ko‘ra, O‘zbekistonda xorijiy oliy ta’lim tashkilotlari soni so‘nggi 3 yilda ikki barobar oshgan. 2020/2021-o‘quv yili boshida respublika bo‘yicha 20 ta xorijiy oliy ta’lim tashkiloti faoliyat yuritgan.