AOKAda Bosh prokuratura huzuridagi Majburiy ijro byurosi rahbariyati ishtirokida matbuot anjumani bo‘lib o‘tdi. Unda MIB organlari faoliyati tahlili yuzasidan axborot berildi.
Ma’lum qilinishicha, “MIB-Portal” dasturi 32 ta tashkilotning 63 ta yo‘nalishdagi axborot tizimlariga integratsiya qilingan. Sudlar va 52 ta ma’muriy organdan ijro hujjatlarni elektron tarzda qabul qilish yo‘lga qo‘yilgan. Byuro tashkil topganidan buyon ijro ishini yuritish sohasida 77 trillion so‘mdan ortiq undiruv amalga oshirilgan. Shundan davlat foydasiga 32 trillion so‘mga yaqin mablag‘ undirilgan.
Joriy yilning o‘tgan davrida jami undiruv 21,7 trillion so‘mni tashkil etgan. Ko‘rsatkich 2020-yilning shu davriga nisbatan 10,4 trillion so‘m yoki 92 foizga oshgan.
Moddiy yordamga muhtoj farzandlar foydasiga 2,5 trillion so‘mdan ortiq aliment pullari undirilgan. Shuningdek, olib borilgan tushuntirish ishlari hamda vakolat doirasida ko‘rsatilgan amaliy yordam natijasida 17 ming 800 dan ortiq oila yarashtirilgan, 29 mingdan ortiq aliment to‘lovchining ish bandligi ta’minlangan.
Qidiruv sohasida 4555 nafar shaxs, 3073 ta avtotransport vositalari topilib, qarzdorlardan 16 milliard so‘mdan ortiq qarzdorliklari undirilgan.
Bundan tashqari, ijtimoiy ehtiyojmand qatlamga manzilli yordam ko‘rsatish bo‘yicha “Temir daftar”, “Ayollar daftari” va “Yoshlar daftari”ga kiritilgan fuqarolarga 511,5 milliard so‘mdan ortiq mablag‘ o‘tkazib berilgan.
Izoh (0)