Таълим сифатини назорат қилиш давлат инспекцияси лицензияга эга бўлмай туриб, фаолият олиб бораётган сохта олий таълим муассасаларидан огоҳлантирди. Бу ҳақда инспекция матбуот котиби хабар қилди.
Қайд этилишича, сўнгги пайтларда ижтимоий тармоқларда лицензияга эга бўлмаган бир қатор ташкилотлар ўзларини нодавлат олий таълим ташкилотлари сифатида тарғиб қилиш ҳолатлари учрамоқда. Хусусан, «Valley Innovative University», Самарқанд—Корея халқаро университети, Ангрен—Корея интернационал университети, Халқаро Европа университети ва бошқа шу каби муассасалар томонидан берилган дипломлар Ўзбекистонда олий таълим муассасаси дипломи сифатида тан олинмайди.
Уларнинг айримлари ҳаттоки хорижда таълим олаётган фуқароларга ўқишини Ўзбекистонга имтиҳонсиз кўчириш бўйича ваъдалар бераётгани айтилмоқда.
Қонун ҳужжатларида белгиланган талабларга мувофиқ, Таълим инспекциясидан олий таълим хизматлари кўрсатиш учун лицензия олмаган нодавлат олий таълим ташкилотлари томонидан берилган дипломлар тан олинмайди.
Сўнгги йилларда нодавлат таълим ташкилотлари сони бир неча баробар ошган. 2018—2020 йиллар оралиғида лицензияга эга бўлган нодавлат олий таълим ташкилотлари сони 13 тани ташкил этган бўлса, биргина 2021 йилнинг ўтган даври мобайнида 18 та нодавлат олий таълим ташкилоти фаолияти лицензияланган.
Давлат статистика қўмитаси маълумотларига кўра, Ўзбекистонда хорижий олий таълим ташкилотлари сони сўнгги 3 йилда икки баробар ошган. 2020/2021-ўқув йили бошида республика бўйича 20 та хорижий олий таълим ташкилоти фаолият юритган.
Мавзуга доир:
Изоҳ (0)