Uzbekistan Airways AJ Yangi yil bayrami munosabati bilan 31-dekabrdan 4-yanvarga qadar O‘zbekiston bo‘ylab amalga oshirilayotgan ichki reyslar aviachiptalariga 30 foizdan 50 foizgacha chegirmalar e’lon qildi. Bu haqda Transport vazirligi xabar qildi.
Ma’lum qilinishicha, chegirmalar O‘zbekiston shaharlari o‘rtasidagi barcha qatnovlarga amal qiladi va quyidagi toifadagi yo‘lovchilar uchun taqdim etiladi:
- yakka tartibdagi yo‘lovchilar uchun 30 foiz;
- turistik guruhlar (5 va undan ortiq kishi), maktab o‘quvchilari, kollej, litsey, OTM talabalari, IIV, MV, DXX, DSQ, DBQ tizimi talabalari va tinglovchilari, boshqa idoralar uchun 40 foiz;
- oila uchun 50 foiz (2 va undan ortiq, ya’ni: er-xotin va ularning 18 yoshdan oshmagan farzandlari, ota va uning 18 yoshdan oshmagan farzandlari yoki ona va uning 18 yoshdan oshmagan farzandlari);
- nafaqaxo‘rlar uchun 50 foiz;
- nogironligi bor shaxslarga 50 foiz;
- 1941—1945-yillar urush qatnashchilari va ularga tenglashtirilgan shaxslarga 50 foiz;
- 1941—1945-yillarda urush va mehnat frontida ko‘rsatgan fidokorligi uchun orden va medallar bilan taqdirlanganlar uchun 50 foiz;
- Chernobil AES halokati oqibatlarini oldini olishda ishtirok etgan ishtirokchilar uchun 50 foiz.
Eslatib o‘tamiz, “O‘zbekiston temir yo‘llari” ham Yangi yil munosabati bilan chegirmalar e’lon qilgandi.
Izoh (0)