Surxondaryo viloyatining Denov tumanidagi Indenim savdo majmuasida portlash sodir bo‘lib, jami 11 kishi jarohat olgani, ikki nafar fuqaro esa voqea joyida vafot etgani haqida xabar berilgandi. “Hududgaz Surxondaryo” gaz ta’minoti filiali direktori Mirzoqul Mansurovning ma’lumot berishicha, portlash sodir bo‘lgan savdo majmua ostidan Denov tumani hokimligi qozonxonasini gaz bilan ta’minlovchi gaz quvuri o‘tgani aniqlangan. Bu haqda “Daryo”ga viloyat hokimligi axborot xizmati rahbari Murodbek Davlatov xabar berdi.
Qayd etilishicha, kecha 14-dekabr kuni soat 08:00 da viloyat hokimligida Denov tumanidagi Indenim savdo majmuasida sodir bo‘lgan noxush holat sabablari muhokama qilingan.
“Viloyat hokimi To‘ra Bobolov, viloyatdagi huquqni muhofaza qiluvchi idoralar rahbarlari, shahar va tuman hokimlarining mas’ul o‘rinbosarlari, masalaga aloqador tashkilot rahbarlari ishtirok etgan majlisda ‘Hududgaz Surxondaryo’ gaz ta’minoti filiali direktori Mirzoqul Mansurov holat bo‘yicha izoh berdi.
Izohda portlash sabablarini o‘rganish maqsadida hodisa ro‘y bergan joyga hukumat komissiyasi va uning tarkibida ‘Hududgazta’minot’ AJ rahbariyatining besh kun davomida tegishli idoralar, tashkilotlar va gaz ta’minoti sohasi mutaxassislari, maxsus texnika va asbob-uskunalarni jalb qilgan holda, o‘rganish o‘tkazishgani ta’kidlandi.
Tekshiruvlarda 2013-yilda qurilgan Indenim savdo majmuasi ostidan Denov tumani hokimligi qozonxonasini gaz bilan ta’minlaydigan yerosti o‘rta bosimli gaz quvuri o‘tkazilgani aniqlangan”, — dedi Murodbek Davlatov.
Murodbek Davlatovning aniqlashtirishicha, gaz tarmoqlari xaritasida bino qurilgan vaqtda tuman hokimligi qozonxonasiga tortilgan gaz tarmog‘i binoning ostida qoldirib ketilgani ko‘rsatilgan. Ma’lumotlarga ko‘ra uch yildan keyin qozonxona faoliyati ham to‘xtatilgan. Gaz quvuri aynan qozonxonaga yetgan joyda berkitib tashlangan.
Qayd etilishicha, yig‘ilishda savdo majmua qurilishi amaldagi qurilish normalari va qoidalari zid tarzda qurilgani ma’lum qilingan.“Bino xavfsizligi va ishonchliligini ta’minlash uchun savdo majmuasi o‘rta bosimli gaz quvurining xavfsizlik zonasini hisobga olgan holda qurilishi lozim bo‘lgan. Shaharsozlik normalari va qoidalariga muvofiq ushbu muhofaza zonasi binoning poydevoridan to‘rt metr masofani tashkil etishi lozim edi. Indenim savdo majmuasi gaz quvurining aynan ustiga qurilgani sababli yer ostidagi kommunikatsiyalar sozligini tekshirish uchun kirish yo‘li bo‘lmagan.
O‘tkazilgan tekshiruvlarda majmua ostida hosil bo‘lgan daydi toklar metall quvurlarning tashqi korroziyasiga va gaz quvurida nuqsonlar paydo bo‘lishiga olib kelgan. Bu esa o‘z navbatida gaz sizib chiqishiga va gaz-havo aralashmasining chaqnashiga sabab bo‘lgani aytildi”, — dedi bu haqda “Daryo”ga ma’lum qilgan mas’ul.
Qo‘shimcha qilinishicha, yig‘ilishda viloyatda yana 25 ta obyekt shu tartibda gaz tarmog‘iga ulangani aytilgan.
“Viloyat hokimi zudlik bilan ushbu obyektlarni gaz tarmog‘idan uzish hamda viloyatdagi ijtimoiy soha obyektlarini inventarizatsiyadan o‘tkazib, noqonuniy holatlar aniqlansa, ularni ham gaz tarmog‘idan uzish va xavfsiz jihozlarga almashtirish yuzasidan tuman hokimlarining qurilish ishlari bo‘yicha o‘rinbosarlari va gaz idoralari rahbarlariga topshiriq berdi. Hamda mazkur holat tafsilotlarini ommaviy axborot vositalari orqali aholiga ochiq-oydin ko‘rsatish bo‘yicha mas’ullarga vazifa yukladi”, — dedi Murodbek Davlatov.
Eslatib o‘tamiz, Surxondaryoning Denov shahri markazidagi Indenim savdo majmuasida kuchli portlash 7-dekabr tongida yuz bergan. Rasmiy ma’lumotlarga ko‘ra, portlash oqibatida ikki kishi halok bo‘lgan, 11 kishi turli tan jarohatlari bilan shifoxonaga yotqizilgan. Keyinchalik Denovdagi portlashda 65 ta uy zarar ko‘rgani, 6 ta xonadon devorlari esa yorilib, yashash uchun xavfli holatga kelib qolgani ma’lum bo‘ldi.
Surxondaryo viloyati hokimi To‘ra Bobolov ikki nafar marhumning yaqinlariga moddiy yordam puli to‘lab berilayotganini ma’lum qildi. U, shuningdek, tadbirkorlarga yetkazilgan zarar, 65 ta xonadon ta’miri va ijtimoiy soha obyektlarining zararlanishi oqibatida kelib chiqqan chiqimlar ham sud qaroriga ko‘ra ikki xil usulda qoplanishini bildirgan.
Holat yuzasidan Jinoyat kodeksining 257-modda (mehnatni muhofaza qilish qoidalarini buzish) va 259-moddalari (yong‘in xavfsizligi qoidalarini buzish) bilan jinoyat ishi qo‘zg‘atilgan.
Shavkat Mirziyoyev boshchiligida o‘tkazilgan videoselektor yig‘ilishida davlat rahbari Denovda gaz quvuri portlashi natijasida sodir bo‘lgan hodisaga to‘xtalib, ushbu noxush voqea hammaning ko‘zini ochishi kerakligini aytdi.
Izoh (0)