O‘zbekiston musulmonlari idorasi raisi, muftiy Nuriddin Xoliqnazarov va Din ishlari bo‘yicha qo‘mita raisi Sodiqjon Toshboyev boshchiligidagi delegatsiya Umra safarini hal etish uchun 1-dekabr kuni Saudiya Arabistoniga jo‘nab ketgandi. Idora matbuot xizmati 9-dekabr kuni yakunlangan ushbu xizmat safari natijalarini e’lon qildi.
Qayd etilishicha, delegatsiya butun dunyoda qo‘llanilayotgan karantin cheklovlari sharoitida Umra safarini tashkil qilish bo‘yicha podshohlik muassasalari bilan muzokaralar olib bordi. COVID pandemiyasi boshlanishidan avval Umra safari uchun pul to‘lab, navbatda turganlar va boshqa fuqarolar uchun ushbu ziyoratni amalga oshirish imkoniyatlari yaqin fursatlarda yaratiladi.
Karantin tartiblariga muvofiq mehmonxonalarda ziyoratchilarning xonalarga, avtobuslarda o‘rindiqlarga joylashtirishda oraliq masofa hisobiga 50 foizgacha qisqartirilish, oziq-ovqat mahsulotlarini qadoqlangan holda tarqatish, o‘rnatilgan boshqa karantin tartib-qoidalarga rioya etish unchalik katta bo‘lmagan miqdorda qo‘shimcha mablag‘larni talab etishi mumkin.
“Umra ziyoratlari muddatlari, qo‘shimcha to‘lov miqdori, vaksinatsiya to‘g‘risidagi ma’lumotlar tez orada ma’lum qilinadi”, — deyiladi O‘zbekiston musulmonlari idorasi xabarida.
Eslatib o‘tamiz, Saudiya Arabistoni hukumati chet elliklar kichik haj — Umra ziyoratini amalga oshirish uchun 10-avgustdan qirollikka kirishi mumkinligini e’lon qilgan edi.
Ziyoratchilar qirollikda tasdiqlangan Pfizer, Moderna, Johnson & Johnson, AstraZeneca vaksinalaridan biri bilan emlangan bo‘lishi yoki manfiy javobli PZR-testni taqdim etishi kerak. Vaksina olmagan ziyoratchilar mamlakatga kelganidan keyin uch kunlik karantindan o‘tib, so‘ng koronavirusga nisbatan qaytadan PZR-test topshiradi.
Saudiya Arabistoni hukumati Xitoy vaksinalarini ham tan oladi, ammo to‘liq emlangandan keyin Pfizer, Moderna, Johnson & Johnson yoki AstraZeneca vaksinasi bilan buster dozasini (vaksinatsiyadan olti oy o‘tib kiritiladigan qo‘shimcha doza) olishi kerak bo‘ladi.
Izoh (0)