Denovdagi portlash oqibatida qulab tushgan savdo majmuasi vayronalari ostidan halok bo‘lgan bir kishi aniqlangandi. Favqulodda vaziyatlar vazirligi qidiruv-qutqaruv ishlari davomida ikkinchi halok bo‘lgan fuqaro topilganini ma’lum qildi.

Foto: Videodan kadr

Eslatib o‘tamiz, Surxondaryoning Denov shahrida joylashgan ikki qavatli “Indenim” savdo majmuasida portlash 7-dekabr kuni soat 03:57 da sodir bo‘lgan. Yong‘in-qutqaruv bo‘linmalari soat 04:02 voqea joyiga yetib borib, chaqnash natijasida sodir bo‘lgan yong‘inni soat 04:25 da o‘chirgan. 30 daqiqa atrofida vayrona ostida olib borilgan qidiruv ishlarida bir nafar halok bo‘lgan fuqaro aniqlangan. Portlash oqibatida 9 nafar fuqaro turli tan jarohati bilan shifoxonaga yotqizilgan.

Hodisa joyiga bosh vazir birinchi o‘rinbosari Ochilboy Ramatov boshchiligidagi hukumat komissiyasi safarbar etilgan. Komissiya tarkibiga IIV, FVV, Milliy Gvardiya, Sog‘liqni saqlash vazirligi va boshqa idoralar vakillari kiritilgan.

Favqulodda vaziyatlar vazirligi axborotiga ko‘ra, ayni paytda ular voqea joyida ish olib bormoqda.