Сурхондарё вилоятининг Денов туманидаги Indenim савдо мажмуасида портлаш содир бўлиб, жами 11 киши жароҳат олгани, икки нафар фуқаро эса воқеа жойида вафот этгани ҳақида хабар берилганди. «Ҳудудгаз Сурхондарё» газ таъминоти филиали директори Мирзоқул Мансуровнинг маълумот беришича, портлаш содир бўлган савдо мажмуа остидан Денов тумани ҳокимлиги қозонхонасини газ билан таъминловчи газ қувури ўтгани аниқланган. Бу ҳақда «Дарё»га вилоят ҳокимлиги ахборот хизмати раҳбари Муродбек Давлатов хабар берди.
Қайд этилишича, кеча 14 декабрь куни соат 08:00 да вилоят ҳокимлигида Денов туманидаги Indenim савдо мажмуасида содир бўлган нохуш ҳолат сабаблари муҳокама қилинган.
«Вилоят ҳокими Тўра Боболов, вилоятдаги ҳуқуқни муҳофаза қилувчи идоралар раҳбарлари, шаҳар ва туман ҳокимларининг масъул ўринбосарлари, масалага алоқадор ташкилот раҳбарлари иштирок этган мажлисда ‘Ҳудудгаз Сурхондарё’ газ таъминоти филиали директори Мирзоқул Мансуров ҳолат бўйича изоҳ берди.
Изоҳда портлаш сабабларини ўрганиш мақсадида ҳодиса рўй берган жойга ҳукумат комиссияси ва унинг таркибида ‘Ҳудудгазтаъминот’ АЖ раҳбариятининг беш кун давомида тегишли идоралар, ташкилотлар ва газ таъминоти соҳаси мутахассислари, махсус техника ва асбоб-ускуналарни жалб қилган ҳолда, ўрганиш ўтказишгани таъкидланди.
Текширувларда 2013 йилда қурилган Indenim савдо мажмуаси остидан Денов тумани ҳокимлиги қозонхонасини газ билан таъминлайдиган ерости ўрта босимли газ қувури ўтказилгани аниқланган», — деди Муродбек Давлатов.
Муродбек Давлатовнинг аниқлаштиришича, газ тармоқлари харитасида бино қурилган вақтда туман ҳокимлиги қозонхонасига тортилган газ тармоғи бинонинг остида қолдириб кетилгани кўрсатилган. Маълумотларга кўра уч йилдан кейин қозонхона фаолияти ҳам тўхтатилган. Газ қувури айнан қозонхонага етган жойда беркитиб ташланган.
Қайд этилишича, йиғилишда савдо мажмуа қурилиши амалдаги қурилиш нормалари ва қоидалари зид тарзда қурилгани маълум қилинган.«Бино хавфсизлиги ва ишончлилигини таъминлаш учун савдо мажмуаси ўрта босимли газ қувурининг хавфсизлик зонасини ҳисобга олган ҳолда қурилиши лозим бўлган. Шаҳарсозлик нормалари ва қоидаларига мувофиқ ушбу муҳофаза зонаси бинонинг пойдеворидан тўрт метр масофани ташкил этиши лозим эди. Indenim савдо мажмуаси газ қувурининг айнан устига қурилгани сабабли ер остидаги коммуникациялар созлигини текшириш учун кириш йўли бўлмаган.
Ўтказилган текширувларда мажмуа остида ҳосил бўлган дайди токлар металл қувурларнинг ташқи коррозиясига ва газ қувурида нуқсонлар пайдо бўлишига олиб келган. Бу эса ўз навбатида газ сизиб чиқишига ва газ-ҳаво аралашмасининг чақнашига сабаб бўлгани айтилди», — деди бу ҳақда «Дарё»га маълум қилган масъул.
Қўшимча қилинишича, йиғилишда вилоятда яна 25 та объект шу тартибда газ тармоғига улангани айтилган.
«Вилоят ҳокими зудлик билан ушбу объектларни газ тармоғидан узиш ҳамда вилоятдаги ижтимоий соҳа объектларини инвентаризациядан ўтказиб, ноқонуний ҳолатлар аниқланса, уларни ҳам газ тармоғидан узиш ва хавфсиз жиҳозларга алмаштириш юзасидан туман ҳокимларининг қурилиш ишлари бўйича ўринбосарлари ва газ идоралари раҳбарларига топшириқ берди. Ҳамда мазкур ҳолат тафсилотларини оммавий ахборот воситалари орқали аҳолига очиқ-ойдин кўрсатиш бўйича масъулларга вазифа юклади», — деди Муродбек Давлатов.
Эслатиб ўтамиз, Сурхондарёнинг Денов шаҳри марказидаги Indenim савдо мажмуасида кучли портлаш 7 декабрь тонгида юз берган. Расмий маълумотларга кўра, портлаш оқибатида икки киши ҳалок бўлган, 11 киши турли тан жароҳатлари билан шифохонага ётқизилган. Кейинчалик Деновдаги портлашда 65 та уй зарар кўргани, 6 та хонадон деворлари эса ёрилиб, яшаш учун хавфли ҳолатга келиб қолгани маълум бўлди.
Сурхондарё вилояти ҳокими Тўра Боболов икки нафар марҳумнинг яқинларига моддий ёрдам пули тўлаб берилаётганини маълум қилди. У, шунингдек, тадбиркорларга етказилган зарар, 65 та хонадон таъмири ва ижтимоий соҳа объектларининг зарарланиши оқибатида келиб чиққан чиқимлар ҳам суд қарорига кўра икки хил усулда қопланишини билдирган.
Ҳолат юзасидан Жиноят кодексининг 257-модда (меҳнатни муҳофаза қилиш қоидаларини бузиш) ва 259-моддалари (ёнғин хавфсизлиги қоидаларини бузиш) билан жиноят иши қўзғатилган.
Шавкат Мирзиёев бошчилигида ўтказилган видеоселектор йиғилишида давлат раҳбари Деновда газ қувури портлаши натижасида содир бўлган ҳодисага тўхталиб, ушбу нохуш воқеа ҳамманинг кўзини очиши кераклигини айтди.
Изоҳ (0)