O‘zbekistonda kuz-qish mavsumiga yetarli darajada tayyor bo‘lmagan 931 ta xususiy bog‘cha vaqtinchalik yopilgan

O‘zbekistondagi 931 ta nodavlat bolalar bog‘chasi kuz-qish mavsumiga tayyorgarligi yetarli darajada bo‘lmagani sababli o‘z faoliyatini vaqtinchalik to‘xtatgan. Bu haqda 15-dekabr kuni o‘tkazilgan brifingda Maktabgacha ta’lim vazirligi axborot xizmati rahbari Mavluda Asqarxo‘jayeva ma’lum qildi.

Uning aytishicha, maktabgacha ta’lim vazirining 23-sentabrdagi buyrug‘iga asosan ishchi guruh tuzilib, joylarda 2021—2022-yillar kuz-qish mavsumida barqaror ishlashga tayyorlash bo‘yicha tegishli nazorat ishlari olib borildi.

Ishchi guruh tomonidan o‘rganilgan ma’lumotlarga ko‘ra, nodavlat maktabgacha ta’lim tashkilotlarining (davlat xususiy sherikchilik, oilaviy maktabgacha ta’lim tashkiloti) umumiy hisobda 931 tasi kuz-qish mavsumiga tayyorgarligi yetarli darajada bo‘lmagani sababli vaqtinchalik o‘z faoliyatini to‘xtatgan.

Ularning soni  hududlar kesimida quyidagicha:

• Qoraqalpog‘iston Respublikasida — 76 ta,
• Xorazm viloyatida — 110 ta
• Andijon viloyatida — 20 ta,
• Buxoro viloyatida — 63 ta,
• Jizzax viloyatida — 54 ta,
• Qashqadaryo viloyatida — 88 ta,
• Navoiy viloyatida — 83 ta,
• Namangan viloyatida — 85 ta,
• Farg‘ona viloyatida — 125 ta,
• Samarqand viloyatida — 97 ta,
• Surxondaryo viloyatida — 94 ta,
• Sirdaryo viloyatida — 26 ta,
• Toshkent viloyatida — 10 ta.