Denovdagi portlashda vafot etganlarning yaqinlariga moddiy yordam puli to‘lab berilmoqda — To‘ra Bobolov
Surxondaryo viloyati Denov shahrida joylashgan “Indenim” savdo markazi portlashi oqibatida 11 nafar fuqaro jabrlangani, shulardan ikki nafari voqea joyida vafot etgani xabar qilingandi. Holat yuzasidan o‘tkazilgan brifingda Surxondaryo viloyati hokimi To‘ra Bobolov ikki nafar marhumning yaqinlariga moddiy yordam puli to‘lab berilayotganini ma’lum qildi, deya xabar berdi “Daryo” muxbiri.
Qayd etilishicha, portlash joyida vafot etgan ikki nafar fuqaro yaqinlariga ayni paytda to‘lab borilayotgan moddiy yordam puliga qo‘shimcha tarzda kompensatsiya pullari ham to‘lab beriladi.
“Vafot etgan fuqarolar yaqinlariga moddiy yordam ko‘rsatilmoqda. Keyinchalik ularga sud qarori bilan kompensatsiya mablag‘lari ham to‘lab beriladi. Hech kim e’tibordan chetda qolmaydi”, — degan viloyat hokimi To‘ra Bobolov.
Qayd etilishicha, hokim marhumlarning yaqinlariga qancha miqdorda moddiy yordam puli to‘lab berilayotganiga aniqlik kiritmagan. U, shuningdek, tadbirkorlarga yetkazilgan zarar, 65 ta xonadon ta’miri va ijtimoiy soha obyektlarining zararlanishi oqibatida kelib chiqqan chiqimlar ham sud qaroriga ko‘ra ikki xil usulda qoplanishini bildirgan.
“Tergov yakuni va sud qaroriga ko‘ra xulosa qilinadi. Agar fors-mojor holatlari bo‘lsa, zararlar davlat tomonidan qoplanadi. Voqea e’tiborsizlik oqibatida kelib chiqqan bo‘lsa, e’tiborsizlikka yo‘l qo‘ygan subyekt tomonidan qoplab beriladi”, — ta’kidlagan viloyat hokimi.
“Daryo” muxbiri bilan suhbatlashgan denovliklar — portlashdan jabrlangan aholi vakillari To‘ra Bobolov ularning uyiga kelib hol-ahvol so‘raganini, portlash oqibatida yashash uchun xavfli ko‘rinishga kelgan xonadonlari buzib tashlanib, qayta qurib berilishi va’da qilinganini aytgan. Bundan tashqari, portlashdan zararlanib, tiklab bo‘lmas darajaga kelgan avtomobil egasi esa mashinasining yangilab berilishidan umidvorligini, viloyat rahbari bunga va’da berganini aytgan.
Fuqaro Ilhom Rajabovning aytishicha, To‘ra Bobolov uning savdo markazi orqasida joylashgan uyi yashash uchun xavfli holatga kelib qolganini, endilikda uyini buzib, yangi qurib berilishini ma’lum qilgan. Yana bir fuqaro Gulnora Nasriddinova esa o‘g‘liga tegishli mashina bino bo‘laklari ostida qolgani uchun qayta tiklash imkoni yo‘qligini aytib, hokim yangi mashina berilishini va’da qilganini bildirgan. G‘anijon Salohov bunday portlashga umrida birinchi marta duch kelayotganini, bunday paytda rahbarlar ularni yolg‘izlatib qo‘ymasligidan umidvorligini aytgan.
Eslatib o‘tamiz, Surxondaryoning Denov shahri markazidagi “Indenim” savdo majmuasida 7-dekabr tongida kuchli portlash yuz berdi. Rasmiy ma’lumotlarga ko‘ra, portlash oqibatida kamida ikki kishi halok bo‘lgan, 11 kishi turli tan jarohatlari bilan shifoxonaga yotqizilgan. Keyinchalik Denovdagi portlashda 65 ta uy zarar ko‘rgani, 6 ta xonadon devorlari esa yorilib, yashash uchun xavfli holatga kelib qolgani ma’lum bo‘ldi. Dastlabki taxminlarga ko‘ra, gaz asbob-uskunalaridan foydalanish qoidalarining buzilishi oqibatida to‘plangan gaz-havo aralashmasining chaqnashi oqibatida yuz bergan.
