Oliy Majlis Senatining yigirma ikkinchi yalpi majlisida “2021-yil uchun O‘zbekiston Respublikasining davlat budjeti to‘g‘risida”gi O‘zbekiston Respublikasining qonuniga o‘zgartirishlar kiritish haqida”gi qonun ko‘rib chiqildi. Bu haqda parlament yuqori palatasi matbuot xizmati xabar berdi.
Ta’kidlanishicha, qonunning asosiy maqsadi 2021-yilda qabul qilingan dasturlar va qarorlardagi ustuvor vazifalar ijrosini ta’minlash va ularning moliyalashtirish manbalarini aniqlashdan iborat. Qonun bilan budjet mablag‘larini taqsimlovchilarga ajratiladigan mablag‘larning cheklangan miqdorlariga o‘zgartirishlar kiritilmoqda.
Jumladan, Davlat maqsadli jamg‘armalari daromadlari prognozi hamda xarajatlari, shuningdek, respublika budjetidan birinchi darajali budjet mablag‘larini taqsimlovchilarga ajratiladigan mablag‘larning cheklangan miqdorlari oshirilmoqda.
Shu maqsadda “Fuqarolar tashabbusi jamg‘armasi”da shakllangan miqdori 1 milliard so‘mgacha bo‘lgan hamda kelib tushgan takliflar soni 100 tadan ortiq bo‘lgan tumanlarga (shaharlarga) respublika budjetidan qo‘shimcha 117 milliard 400 million so‘m mablag‘ ajratilmoqda.
Shuningdek, Toshkent shahar mahalliy budjetiga ijtimoiy-iqtisodiy holatni yaxshilash, shu jumladan, infratuzilma obyektlarini qurish, mukammal ta’mirlash va jihozlash uchun qo‘shimcha 200 milliard so‘m mablag‘ ajratilyapti.
Bundan tashqari, davlat va jamiyat ehtiyojlari uchun yer uchastkalarining olib qo‘yilishi munosabati bilan jismoniy va yuridik shaxslarga yetkazilgan zararlarni qoplash bo‘yicha markazlashtirilgan jamg‘armaga qo‘shimcha 50 milliard so‘m transfertlar yo‘naltirilmoqda.
“Qonunning ma’qullanishi respublika budjetidan mablag‘ ajratish, mahalliy byudjetlardan ushbu maqsadlarga sarflanishi nazarda tutilgan mablag‘larni hududni ijtimoiy-iqtisodiy rivojlantirishga yo‘naltirish imkonini yaratadi”, — deyiladi xabarda.
Qonun senatorlar tomonidan ma’qullangan.
Avvalroq senatorlar 2022-yil uchun davlat budjeti to‘g‘risidagi qonunni ma’qullagani to‘g‘risida xabar berilgandi.
Izoh (0)