O‘zbekistonda 4 mln tonna radioaktiv chiqindi mavjudligi ma’lum qilindi

AOKAda Sanoat xavfsizligi davlat qo‘mitasi mutasaddilari ishtirokida o‘tkazilgan matbuot anjumanida O‘zbekistondagi radioaktiv chiqindilar to‘g‘risida ma’lumot berildi. Ta’kidlanishicha, mamlakatda 4 million tonna radioaktiv chiqindi mavjud.

Ma’lum qilinishicha, ushbu radioaktiv chiqindilar Sovet Ittifoqi davrida uran konlari faoliyati natijasida to‘planib qolgan. Bu muammo Markaziy Osiyoning boshqa davlatlarida ham mavjud (masalan, Qozog‘istonda — 240 million tonna).

Mazkur chiqindilar joylashgan hududlarni ekologik sog‘lomlashtirish ishlarini amalga oshirish maqsadida Yevropa tiklanish va taraqqiyot banki, Yevropa Ittifoqi hamda qator davlatlarning homiyligi yordamida 2 million yevro miqdorida birinchi grant ajratilishi bo‘yicha qaror qabul qilingan.

Sanoat xavfsizligi davlat qo‘mitasi raisi o‘rinbosari — Radiatsiya va yadro xavfsizligi departamenti boshlig‘i Ibrohim Toshkentboyevning so‘zlariga ko‘ra, 2021-yilda 32 ta tekshiruv va 189 ta nazorat-profilaktika ishlari o‘tkazilgan. Radiatsiya va yadro xavfsizligi departamenti o‘tkazgan tekshiruvlarda 1920 ta kamchilik aniqlangan. Aniqlangan kamchiliklarni bartaraf etish bo‘yicha tegishli chora-tadbirlar rejalari tuzilgan va ular bartaraf etilgan.

Shuningdek, Toshkentboyevning so‘zlariga ko‘ra, tekshiruv davomida radiatsiya va yadro xavfsizligini buzgan 41 nafar xodim javobgarlikka tortilgan.

Iyun oyida O‘zbekistonga Atom energiyasi bo‘yicha xalqaro agentlik (MAGATE) ekspertlari guruhi 12 kunlik tashrif bilan kelgan. Inspektorlar atom energetikasi dasturining infratuzilmasini rivojlantirish jarayonini har tomonlama baholab, hamma narsa rejaga muvofiq va barcha me’yoriy talablarga rioya qilinmoqda degan xulosaga kelgan.