Qamashi tumani misolida 158 ta tuman hokimlari 15 kun muddatda o‘z tumanida xizmatlarni rivojlantirish dasturini ishlab chiqib taqdim etadi. Ularda xizmatlarni rivojlantirish uchun 2022-yilda 1 trillion so‘m ajratiladi. Bu haqda prezident Shavkat Mirziyoyev boshchiligida o‘tkazilayotgan xizmatlar sohasida amalga oshirilayotgan ishlar va kelgusi yil rejalar masalalariga bag‘ishlangan videoselektor yig‘ilishida ma’lum qilindi.
Prezident sanoati rivojlangan 27 ta tumanda savdo, umumiy ovqatlanish, logistika, mehmonxona, texnik xizmat ko‘rsatish va ko‘ngilochar maskanlar xizmatlariga ustuvorlik berilishini bildirdi. Xususan, kelgusi yilda Ohangaron tumanida yirik qurilish materiallari klasterlari ishga tushishi hisobiga, logistika, qurilish, autsorsing, ekspertiza, savdo va ovqatlanish, mehmonxona kabi xizmatlarga talab kamida 2 barobarga oshishi qayd etildi.
Mas’ul tashkilotlarga bir oy muddatda yirik investitsiya loyihalari atrofida xizmat ko‘rsatish obyektlarini barpo etish bo‘yicha dastur ishlab chiqish, bunda kamida 50 mingta ish o‘rinlari yaratish nazarda tutilishi kerakligi, ayni maqsadlar uchun ushbu 27 ta tumanga 200 milliard so‘m ajratilishi belgilandi.
“Qishloq xo‘jaligida daromad yuqori bo‘lgan tumanlarda umumiy xizmatlar bilan birga, zamonaviy agroxizmatlar rivojlantiriladi. Masalan, 158 ta qishloq tumanida bir oyda o‘rtacha bir kishiga 270 ming so‘mlik xizmat ko‘rsatilsa, Qamashida bu ko‘rsatkich 180 ming so‘mni tashkil etadi. Lekin tumanning salohiyatini to‘liq ishga solish orqali bu ko‘rsatkichni kelgusi yilning o‘zida 300 ming so‘mga yetkazish mumkin”, – deydi prezident.
Shunga ko‘ra Qamashida paxta va g‘alladan bo‘shaydigan 940 gektar, jumladan, kelgusi yilda 400 gektar yer maydoni 1 ming aholiga ijaraga berilishi, ushbu yerlarda urug‘ va ko‘chat, o‘g‘it yetkazib berish, agrohimoya, suv tejovchi texnologiyalarga xizmat ko‘rsatish va mini texnika bilan ta’minlash bo‘yicha alohida Agroxizmatlar markazi tashkil etilishi aytildi.
Tuman aholisida 100 ming boshdan ortiq qoramol, 200 mingdan ziyod qo‘y-echki va 450 mingga yaqin parranda mavjudligi, shu bois kamida 5 ta xususiy veterinariya xizmati korxonasi tashkil etib, 50 dan ziyod ish o‘rni yaratish zarurligi qayd etildi. Buning uchun tuman budjeti hisobidan 50 nafar yoshlar zootexnik-veterinariya yo‘nalishidagi o‘quv kurslarida o‘qitiladi.
Tuman markazida quvvati 200 tonnalik sovitkichga ega yangi “Ekobozor” quriladi va 1 mingta ish o‘rni yaratiladi.
Shu bilan birga, Qamashida yangi ish boshlagan 60 nafar hokim yordamchilari tomonidan aholi uchun kundalik zarur bo‘lgan 21 turdagi xizmatlar bo‘yicha 600 dan ziyod loyihalar shakllantirilgan. Tumanning 2 ta markaziy ko‘chasiga yoritgich chiroqlarini o‘rnatib, 100 dan ziyod savdo, ovqatlanish va boshqa xizmatlar ko‘rsatish shoxobchalarini tashkil etish reja qilingani ma’lum qilindi.
Davlat rahbari Qamashi tumani misolida 158 ta tuman hokimlari 15 kun muddatda o‘z tumanida xizmatlarni rivojlantirish dasturini ishlab chiqib taqdim etishi bo‘yicha topshiriq berildi. Ushbu tumanlarda xizmatlarni rivojlantirish uchun, kelgusi yilda 1 trillion so‘m ajratiladi.
Izoh (0)