“Aholisi ko‘p shaharlardagi 10 mingga yaqin ko‘p qavatli uylarning noturar obyekt sifatida 10 foizidan ham foydalanilmayapti” – Shavkat Mirziyoyev

Prezident Shavkat Mirziyoyev boshchiligida o‘tkazilayotgan videoselektor yig‘ilishida xizmatlar sohasini rivojlantirish uchun har bir tuman va shahar kesimida ishlab chiqiladigan alohida dasturning ikkinchi yo‘nalishiga ko‘ra 29 ta o‘rta va yirik shaharlar hamda aholisi 300 mingdan yuqori 6 ta tumanda zamonaviy bozor xizmatlari rivojlantirilishi aytildi.

Bular: Nukus, Andijon, Xonobod, Buxoro, Kogon, Jizzax, Qarshi, Shahrisabz, Navoiy, Zarafshon, G‘ozg‘on, Kattaqo‘rg‘on, Termiz, Guliston, Shirin, Yangiyer, Nurafshon, Bekobod, Ohangaron, Olmaliq, Angren, Chirchiq, Yangiyo‘l, Quvasoy, Farg‘ona, Qo‘qon, Marg‘ilon, Urganch, Xiva shaharlari hamda Asaka, Shahrixon, G‘ijduvon, Denov, Urgut, Past Darg‘om tumanlari.

Eng avvalo, aholisi ko‘p shahar va tumanlarda xizmatlar ko‘lamini kengaytirish uchun eng dolzarb masala – bu joy ajratish ekanligi, lekin mazkur shaharlarda 10 mingga yaqin ko‘p qavatli uylar mavjud bo‘lib, noturar obyekt sifatida ushbu uylarning 10 foizidan ham foydalanilmayotgani qayd etildi.

Aholiga xizmat ko‘rsatish uchun eng qulay joy – ko‘p qavatli uylarning birinchi qavati hisoblanishi, ammo shaharlarda ko‘p qavatli uylar yerto‘lalari ham deyarli bo‘sh turgani, sababi shu kungacha qurilgan ko‘p qavatli uylarning yerto‘lalari odamlar ishlashi uchun mo‘ljallanmagani aytildi.

Mas’ullarga bir oy muddatda yangi quriladigan ko‘p qavatli uylar yerto‘lasida xizmat ko‘rsatish imkoniyatlarini yaratish bo‘yicha qurilish normalariga o‘zgartirish kiritish topshirig‘i berildi. Shuningdek, ko‘p qavatli uylardagi xonadonlarni noturar obyektga aylantirishni soddalashtirish bo‘yicha hukumatga qaror loyihasini kiritish bo‘yicha vazifa belgilandi. Bunda keraksiz byurokratiyani olib tashlab, yong‘in xavfsizligi va sanitariya bo‘yicha aniq talablarni belgilanadi.