АОКАда Саноат хавфсизлиги давлат қўмитаси мутасаддилари иштирокида ўтказилган матбуот анжуманида Ўзбекистондаги радиоактив чиқиндилар тўғрисида маълумот берилди. Таъкидланишича, мамлакатда 4 миллион тонна радиоактив чиқинди мавжуд.
Маълум қилинишича, ушбу радиоактив чиқиндилар Совет Иттифоқи даврида уран конлари фаолияти натижасида тўпланиб қолган. Бу муаммо Марказий Осиёнинг бошқа давлатларида ҳам мавжуд (масалан, Қозоғистонда — 240 миллион тонна).
Мазкур чиқиндилар жойлашган ҳудудларни экологик соғломлаштириш ишларини амалга ошириш мақсадида Европа тикланиш ва тараққиёт банки, Европа Иттифоқи ҳамда қатор давлатларнинг ҳомийлиги ёрдамида 2 миллион евро миқдорида биринчи грант ажратилиши бўйича қарор қабул қилинган.
Саноат хавфсизлиги давлат қўмитаси раиси ўринбосари — Радиация ва ядро хавфсизлиги департаменти бошлиғи Иброҳим Тошкентбоевнинг сўзларига кўра, 2021 йилда 32 та текширув ва 189 та назорат-профилактика ишлари ўтказилган. Радиация ва ядро хавфсизлиги департаменти ўтказган текширувларда 1920 та камчилик аниқланган. Аниқланган камчиликларни бартараф этиш бўйича тегишли чора-тадбирлар режалари тузилган ва улар бартараф этилган.
Шунингдек, Тошкентбоевнинг сўзларига кўра, текширув давомида радиация ва ядро хавфсизлигини бузган 41 нафар ходим жавобгарликка тортилган.
Эслатиб ўтамиз, Ўзбекистондаги илк атом электр станциясини барпо этиш уч босқичда амалга оширилади. Биринчи босқич 2019—2020 йилларда АЭС қуриладиган жой аниқланади, 2020—2021 йилларда лойиҳанинг техник-иқтисодий асосини ишлаб чиқиш режалаштирилмоқда. 2022 йилдан эса объект қурилишига киришилади. Россия дизайни асосида қуриладиган ушбу АЭС қиймати тахминан 11 миллиард долларга баҳоланган.Июнь ойида Ўзбекистонга Атом энергияси бўйича халқаро агентлик (МАГАТЭ) экспертлари гуруҳи 12 кунлик ташриф билан келган. Инспекторлар атом энергетикаси дастурининг инфратузилмасини ривожлантириш жараёнини ҳар томонлама баҳолаб, ҳамма нарса режага мувофиқ ва барча меъёрий талабларга риоя қилинмоқда деган хулосага келган.
Изоҳ (0)