“2022-yilda yo‘l bo‘ylarida kamida 3 mingta loyihani to‘liq ishga tushirish shart” – Shavkat Mirziyoyev

Prezident Shavkat Mirziyoyev boshchiligida o‘tkazilayotgan videoselektor yig‘ilishida xizmatlar sohasini rivojlantirish uchun har bir tuman va shahar kesimida ishlab chiqiladigan alohida dasturga ko‘ra viloyat hokimlari yo‘l bo‘yi servis obyektlarini joylashtirish loyihalarini faqat va faqat bosh vazir huzurida taqdim etishi ma’lum qilindi.

Ushbu loyihalarga kelgusi yilda 200 milliard so‘m ajratilishi qayd etildi. “Umuman, kelgusi yilda yo‘l bo‘ylarida kamida 3 mingta loyihani to‘liq ishga tushirish shart”, – deya ta’kidladi prezident.

Shuningdek, magistral yo‘l bo‘yi va chegara oldi hududlarida logistika xizmatlarini keng yo‘lga qo‘yish uchun katta imkoniyatlar mavjudligi, G‘ijduvonda 34 gektar maydonda Qoraqalpog‘iston, Xorazm, Buxoro, Navoiy va Qashqadaryoni bog‘lovchi viloyatlararo ulgurji savdo markazini qurib, 5 ming aholi bandligini ta’minlash mumkinligi bildirildi.

Shavkat Mirziyoyev o‘z saylovoldi dasturida tilga olgan mavzu — Toshkent shahriga kuniga 130 ming tonna yuk katta hajmli mashinalarda kirib chiqishi tufayli poytaxtda tirbandlik, yo‘llar sifati va havoning tozaligiga ham salbiy ta’sir ko‘rsatishi masalasiga to‘xtalib o‘tdi.

Davlat rahbari O‘rta Chirchiq, Yuqori Chirchiq, Quyi Chirchiq va Toshkent tumanlarida yuk taqsimlovchi yirik ulgurji savdo logistika markazlarini qurish orqali bu masalani hal qilish mumkinligini takrorladi.

Viloyat hokimlariga xalqaro yo‘llar kesishmalarida yirik savdo va logistika markazlarini tashkil etish loyihalarini boshlashi bo‘yicha topshiriq berildi. Shuningdek, Toshkent tumanidagi “G‘ishtko‘prik” bojxona postini kengaytirish, 11 kilometr yo‘l bo‘yini zamonaviy qiyofaga keltirish, 400 gektar maydonda savdo va logistika markazini tashkil etish hisobiga kuniga 5 mingta yuk transporti, 35 ming kishiga xizmat qiladigan infratuzilma yaratish mumkinligi aytildi.

Mas’ullar bir oy muddatda barcha qo‘shni davlatlar bilan chegara o‘tkazish punktlari va ularga boradigan yo‘llarni o‘rganib, servis infratuzilmasini tubdan yaxshilash bo‘yicha aniq chora-tadbirlarni belgilab, har o‘n besh kunda muhokama qilib borishi belgilandi. 158 ta qishloq tumanlarida xizmat ko‘rsatish sohasida 300 ming ish o‘rni yaratilishi, bosh vazir har bir tuman bo‘yicha xizmatlar rivojlantirish va yangi ish o‘rinlari yaratish dasturini tasdiqlashi belgilandi.